రైళ్ల సంఖ్యను పెంచండి : ఎంపీ చామల కిరణ్ కుమార్ రెడ్డి
దిశ; తెలంగాణ బ్యూరో : భువనగిరి నియోజకవర్గం మీదుగా వెళ్లే రైళ్ల సంఖ్యను పెంచడంతో పాటు హల్టింగ్ లకూ అవకాశం ఎక్కువ ఇవ్వాలని ఎంపీ చామల కిరణ్ కుమార్ రెడ్డి పేర్కొన్నారు. గురువారం ఆయన దక్షిణ మధ్య రైల్వే జనరల్ మేనేజర్ తో ప్రత్యేకంగా భేటీ అయ్యారు. ఈ సందర్భంగా ఎంపీ మాట్లాడుతూ... నియోజకవర్గ పరిధిలోని ఆలేరు, జనగామ జిల్లా కేంద్రంలోని భువనగిరి స్టేషన్ లలో అదనపు హాల్టింగులు, ఫ్రీక్వెన్సిని పెంచాలని కోరారు. దీంతో పాటు పద్మావతి ఎక్స్‌ప్రెస్ జిల్లా కేంద్రమైన భువనగిరిలో ఆగడం లేదన్నారు. దీని వలన ఈ ట్రైన్ కోసం దాదాపు 70. కి.మీ ప్రయాణించాల్సి వస్తుందన్నారు. మచిలీపట్నం ఎక్స్ ప్రెస్ కూడా భువనగిరి, ఆలేరు, జనగామ స్టేషన్‌లలో ఆగడం లేదన్నారు. ఇక కాకతీయ ట్రైన్ భువనగిరి స్టేషన్ కు ఉదయం 8 గంటలు లోపు వచ్చేలా టైమింగ్స్ మార్పులు తేవాలన్నారు. ప్రస్తుతం పది నుంచి 11 గంటల మధ్యలో వస్తుందని వివరించారు. సికింద్రాబాద్ నుండి వరంగల్ వరకు పుష్పల్ రైలు టైమ్ ప్రీక్వెన్సీని పెంచాలన్నారు. దీని వలన ఉద్యోగులు, విద్యార్ధులకు మేలు జరుగుతుందని వివరించారు.
