రేవంత్ రెడ్డే సీఎం.. డీకే శివకుమార్ సాక్షిగా తేల్చేసిన కాంగ్రెస్ నేతలు

దిశ, వెబ్‌డెస్క్: రానున్న ఎన్నికల్లో తెలంగాణలో కాంగ్రెస్ గెలిస్తే రేవంత్ రెడ్డే ముఖ్యమంత్రి అని పలువురు రాష్ట్ర నేతలు తేల్చేశారు. అది కూడా కర్ణాటక డిప్యూటీ సీఎం డీకే శివకుమార్ సాక్షిగా ఈ ప్రకటనలు చేశారు. సీఎం.. సీఎం అంటూ కాంగ్రెస్ సభల్లో రేవంత్ రెడ్డిని ఉద్దేశించి పార్టీ కార్యకర్తలు, అభిమానులు నినాదాలు చేస్తూ ఉంటారు. కానీ ఇప్పుడు ఎన్నికల వేళ నేతలు రేవంత్ రెడ్డి సీఎం అంటూ బహిరంగ సభల్లో వ్యాఖ్యల చేస్తుండటం కీలకంగా మారింది.

రెండో విడత బస్సు యాత్రలో భాగంగా శనివారం తాండూరులో నిర్వహించిన సభలో డీకే శివకుమార్ పాల్గొన్నారు. ఈ సందర్బంగా ఆయన ముందే కొంతమంది నేతలు రేవంత్ రెడ్డి సీఎం అవ్వబోతున్నారంటూ ప్రసంగాలు చేయడం కాంగ్రెస్‌లో చర్చనీయాంశంగా మారింది. అంతేకాకుండా కాంగ్రెస్ నేతలు మరో అడుగు ముందుకేశారు. రేవంత్ రెడ్డి సీఎం కాగానే ఆరు గ్యారెంటీలపై రేవంత్ తొలి సంతకం చేస్తారంటూ చెప్పుకొచ్చారు. తాండూరు కాంగ్రెస్ అభ్యర్థి మనోహర్ రెడ్డితో పాటు కాంగ్రెస్ నేత ప్రసాద్ ఈ తరహా కామెంట్స్ చేశారు.