ఘోర రోడ్డు ప్రమాదం.. అన్న, తమ్ముడు మృతి

దిశ ప్రతినిధి, మహబూబ్ నగర్ : బర్త్ డే పార్టీకి వెళ్తూ రోడ్డు ప్రమాదంలో ఇద్దరు యువకులు మృతి చెందారు. వివరాల ప్రకారం.. దేవరకద్ర మండలంలోని గోపన్‌పల్లి గ్రామానికి చెందిన మాజీ సర్పంచ్ పకీరప్ప చిన్న కుమారుడు శేషు(16), పకీరప్ప సోదరుడు శ్రీనివాసులు కుమారుడు మహేష్(18) పళ్ళమర్రి గ్రామంలో తమ బంధువుల ఇంట్లో జరగనున్న బర్త్ డే పార్టీకి బైకుపై బయలుదేరారు.

ఈ క్రమంలోనే దేవరకద్ర సమీపంలో వేగంగా వస్తున్న డీసీఎం బైకును ఢీకొట్టింది. ఈ ప్రమాదంలో శేషు అక్కడికక్కడే మరణించాడు. గాయపడ్డ మహేష్‌ను ఆసుపత్రికి తరలిస్తుండగా మార్గమధ్యంలో మృతిచెందాడు.

ఒకే కుటుంబానికి చెందిన ఇద్దరు యువకులు రోడ్డు ప్రమాదంలో మరణించడంతో వారి కుటుంబ సభ్యులు శోక సంద్రంలో మునిగిపోయారు. ఇద్దరి మృతదేహాలను పోస్టుమార్టం నిమిత్తం దేవరకద్ర ఎస్‌ఐ వెంకటేశ్వర్లు ఆధ్వర్యంలో జిల్లా ఆసుపత్రికి తరలించారు.