Blue Moon : రక్షాబంధన్ నాడు బ్లూ మూన్.. ఈ అద్భుతం ఎలా జరుగుతుందో తెలుసుకుందామా..

దిశ, ఫీచర్స్ : రక్షా బంధన్ రోజు అందరికీ ప్రత్యేకమైనది. అంతరిక్షం పై ఆసక్తి ఉన్న వారికి మరీ ప్రత్యేకం కానుంది. ఎందుకంటే ఈ ఆగస్టు 19న ఆకాశంలో బ్లూ మూన్ కనిపించనున్నాడని శాస్త్రవేత్తలు చెబుతున్నారు. అయితే పౌర్ణమి రోజున చంద్రుడు ఎందుకు అంతే ప్రత్యేకంగా ఉంటాడు అనే ప్రశ్న చాలామంది మదిలో తలెత్తుతుంది. మరి దాని వెనుక ఉన్న సైన్స్ ఏమిటో ఇప్పుడు తెలుసుకుందాం.

చంద్రుడు భూమి చుట్టూ తిరుగుతున్నప్పుడు కొన్నిసార్లు భూమికి దగ్గరగా వస్తుంది. మరికొన్ని సార్లు అది భూమికి దూరంగా కదులుతూ ఉంటుంది. చంద్రుడు భూమికి 90 శాతం సమీపంలో ఉన్నప్పుడు అద్భుతాలు జరుగుతుంటాయి. అలాంటి రోజునే సూపర్ మూన్ ఏర్పడుతుంది. ఎందుకంటే ఈ రోజున చంద్రుడు పూర్తిగా కనిపిస్తాడు. చంద్రుడు దగ్గరగా ఉండటం వల్ల, అది పరిమాణంలో కొంచెం పెద్దదిగా కనిపిస్తుంది. దాన్ని సూపర్‌ మూన్‌ అంటారు. ఇప్పుడు బ్లూ మూన్ గురించి తెలుసుకుందాం.

చంద్రుడు రోజూ ఒకేలా కనిపించడు..

చంద్రుడు రోజూ ఒకేలా కనిపించడు. ఒక్కో రోజు ఒక్కోవిధంగా ఉదయిస్తాడు. చంద్రుడు ఎనిమిది దశల్లో ఆకాశంలో కనిపిస్తాడు. కొన్నిసార్లు పూర్తిగా, కొన్నిసార్లు సగం ఇలా కనిపిస్తాడు. చంద్రుని దశల చక్రం ఒక నెల పాటు కొనసాగుతుంది. అందుకే మనం సాధారణంగా సంవత్సరంలో 12 పౌర్ణమి చంద్రులను చూస్తాము.

బ్లూ మూన్ ఎప్పుడు వస్తుంది ?

చంద్రుని దశల్లో ఒక చక్రం పూర్తి కావడానికి 29.5 రోజులు పడుతుంది. అంటే 12 చంద్ర చక్రాలను పూర్తి చేయడానికి 354 రోజులు పడుతుంది. ఈ కారణంగా 13వ పూర్ణిమ ప్రతి 2.5 సంవత్సరాలు లేదా అంతకంటే ఎక్కువ క్యాలెండర్ సంవత్సరంలో జరుపుకుంటారు. ఈ 13వ పౌర్ణమిని బ్లూ మూన్ అంటారు. ఈ బ్లూ మూన్‌ని మనం ఆగస్టు 19న చూడబోతున్నాం. నాసా తెలిపిన వివరాల ప్రకారం చివరి సారిగా బ్లూ మూన్ ఆగస్ట్ 30, 2023న కనిపించింది. బ్లూ మూన్ ప్రతి రెండు మూడు సంవత్సరాలకు ఒకసారి వస్తుంది. తదుపరి సీజనల్ బ్లూ మూన్ మే 31, 2026న సంభవించనుందని అంచనా.