ఇదో వింత క్రికెట్ టోర్ని..బరిలో టీమ్ ఇండియా

దిశ, వెబ్ డెస్క్ : హాంకాంగ్ క్రికెట్ సిక్స్ టోర్నీ గురించి క్రికెట్ అభిమానులకు సుపరిచితమే. అయితే ఈ టోర్నీ నిర్వహించే నియమాలు సాధారణంగా అంతర్జాతీయ క్రికెట్ టోర్నీలకు ఉండే నియమ, నిబంధనలకు భిన్నంగా ఉండటం ఈ టోర్నీాకి ప్రత్యేకతను తెచ్చిపెట్టింది. నవంబర్ 1 నుంచి నవంబర్ 3 వరకు జరిగే హాంకాంగ్ క్రికెట్ సిక్స్ టోర్నీలో పాల్గొనే జట్లు 11మంది ఆటగాళ్ళతో కాకుండా కేవలం ఆరుగురు ఆటగాళ్లు మాత్రమే బరిలోకి దిగాల్సి ఉంటుంది. అలాగే, ఈ టోర్నమెంట్‌లో చాలా కొత్త నిబంధనలు ఉన్నాయి. ఈ టోర్నమెంట్ టీ20 క్రికెట్‌కు భిన్నంగా ఉంటుంది. టీమ్ ప్లేయింగ్ స్క్వాడ్‌లో ఆరుగురు ఆటగాళ్లకు మాత్రమే అనుమతి ఉంటుంది. ఒక్కో మ్యాచ్‌లో ఒక ఇన్నింగ్స్‌లో 5 ఓవర్లు ఆడతారు. ఒక్కో ఓవర్‌లో 8 బంతులు ఉంటాయి. సాధారణ మ్యాచ్‌ల్లో ఓవర్‌కు 6 బంతులు మాత్రమే ఉంటాయి. ఒక వైడ్, నోబాల్‌కు 2 పరుగులు ఇవ్వబడతాయి. వికెట్ కీపర్ తప్ప, ఫీల్డింగ్ జట్టులోని ప్రతి సభ్యుడు తప్పనిసరిగా బౌలింగ్ చేయాలి. నిర్ణీత 5 ఓవర్లలోపు 5 వికెట్లు పడితే, చివరి బ్యాటర్ సింగిల్‌గా బ్యాటింగ్ చేసే వెసులుబాటు ఉంది. మరొక ఆటగాడితో ఒకే బ్యాట్స్‌మన్ రన్నర్‌గా నాన్-స్ట్రైక్‌లో ఉండవచ్చు అయితే , అతడిని బ్యాటింగ్‌కు అనుమతించరు.

బ్యాట్స్‌మెన్ 31 పరుగులు చేస్తే, అతను బ్యాటింగ్‌ను నిలిపివేసి తిరిగి పెవిలియన్‌కు వెళ్లాలి. ఆ తర్వాత, ఇతర బ్యాట్స్‌మెన్ అవుట్ అయితే, రిటైర్డ్ బ్యాట్స్‌మన్ మళ్లీ బ్యాటింగ్ చేయవచ్చు.

హాంకాంగ్ సిక్స్ టోర్నమెంట్ ఫార్మాట్ లో పాల్గొనే మొత్తం 12 జట్లను రెండు గ్రూపులుగా విభజిస్తారు. అత్యధిక మ్యాచ్‌లు గెలిచిన మొదటి నాలుగు జట్లు తదుపరి రౌండ్‌లోకి ప్రవేశిస్తాయి. రెండవ రౌండ్‌లో, సెమీ-ఫైనల్ ఉంటుంది. ఆ తర్వాత ఫైనల్ మ్యాచ్ జరుగుతుంది. నవంబర్ 1 నుంచి హాంకాంగ్ సిక్స్ టోర్నీ ప్రారంభం కానుంది. మూడు రోజుల పాటు జరిగే ఈ టోర్నీలో చివరి మ్యాచ్ నవంబర్ 3న జరగనుంది. హాంకాంగ్‌లోని నేషనల్ క్రికెట్ స్టేడియం ఈ మ్యాచ్‌లన్నింటికీ ఆతిథ్యం ఇవ్వనుంది. హాంకాంగ్ సిక్స్ టోర్నమెంట్ 1993లో ప్రారంభమైంది. 1997 వరకు ప్రతి ఏటా నిర్వహించే ఈ టోర్నీ ఆ తర్వాత కొంత కాలం నిలిచిపోయింది. 2001లో మళ్లీ ప్రారంభమవ్వగా వరుసగా 12 సీజన్‌లు నిర్వహించారు. కానీ 2012లో మళ్లీ ఆగిపోయింది. ఈ టోర్నీని మళ్లీ చివరిసారిగా 2017లో నిర్వహించారు. ఇప్పుడు 7 సంవత్సరాల తర్వాత, హాంకాంగ్ క్రికెట్ అసోసియేషన్ మళ్లీ సిక్స్-ఎ-సైడ్ టోర్నీని నిర్వహిస్తుంది. హాంకాంగ్ క్రికెట్ సిక్స్ టోర్నీలో భారత జట్టు పాల్గొంటున్నప్పటికి టోర్నీ నిబంధనల మేరకు టీమ్ ఇండియా మొత్తం కాకుండా కేవలం ఆరుగురు ఆటగాళ్లు మాత్రమే ఆడుతారు.