బలవంతపు ముద్దు వివాదం.. ఫెడరేషన్‌ చీఫ్‌పై సస్పెన్షన్‌ వేటు
దిశ, వెబ్‌డెస్క్: స్పెయిన్‌ ఫుట్‌బాల్‌ ఫెడరేషన్‌ చీఫ్‌ లూయిస్‌ రుబియాలెస్ తమ దేశ స్టార్‌ క్రీడాకారిణి జెన్నిఫర్‌ హెర్మోసోను పెదాలపై బలవంతంగా ముద్దు పెట్టుకున్నందుకు తగిన మూల్యం చెల్లించుకున్నాడు. ఈ ఉదంతం అనంతరం స్పెయిన్‌లో చెలరేగిన ఆందోళనల నేపథ్యంలో రుబియాలెస్‌పై ఫిఫా సస్పెన్షన్‌ వేటు వేసింది. ఈ సస్పెన్షన్‌ 90 రోజుల పాటు అమల్లో ఉంటుందని ఫిఫా పేర్కొంది. సస్పెన్షన్‌తో పాటు రుబియాలెస్‌పై క్రమశిక్షణా చర్యలు కూడా ఉంటాయని తెలిపింది.
అసలు ఏమి జరిగిందంటే.. స్పెయిన్‌ మహిళల ఫుట్‌బాల్‌ జట్టు విజేతగా అవతరించిన అనంతరం మెడల్స్‌ ప్రజెంటేషన్‌ సందర్భంగా రుబియాలెస్.. జెన్నిఫర్‌ హెర్మోసోను పెదాలపై బలవంతంగా ముద్దు పెట్టుకున్న విషయం తెలిసందే. ఆ సమయంలో రుబియాలెస్.. జెన్నిఫర్‌తో పాటు మిగతా క్రీడాకారిణులను కూడా చెంపలపై ముద్ద పెట్టుకుని అసభ్యకరంగా ప్రవర్తించాడు. రుబియాలెస్ నుంచి ఊహించని ఈ ప్రవర్తన చూసి జెన్నిఫర్‌తో పాటు అక్కడున్న వారంతా షాక్‌కు గురయ్యారు. దీంతో స్పెయిన్‌లో పెద్ద ఎత్తున ఆందోళనలు చెలరేగాయి. ఈ నేపథ్యంలో ఆ దేశ ప్రధాని పెడ్రో సాంచెజ్‌ రంగంలోకి దిగారు. రుబియాలెస్ బాధ్యతాయుతమైన వివరణ ఇవ్వాలని సూచించారు. ఈ క్రమంలో ఫిఫా జోక్యం చేసుకుని రుబిమాలెస్‌పై సస్పెన్షన్‌ వేటు వేసింది.
