తొలి రౌండ్‌లో ఇండియాకు నిరాశ.. లక్ష్యసేన్ ఔట్
ముల్హీమ్ (జర్మనీ): జెర్మన్ ఓపెన్ సూపర్ 300 బ్యాడ్మింటన్ టోర్నీలో భారత్ ఆటగాడు లక్ష్య సేన్ పోరాటం తొలి రౌండ్‌లోనే ముగిసింది. బుధవారం జరిగిన ఈ మ్యాచ్‌లో లక్ష్య సేన్ వరుస సెట్లలో క్రిస్టో పొపోవ్ చేతిలో ఓటమిపాలయ్యాడు. భారత 12వ ర్యాంక్ ఆటగాడు, ఈ టోర్నీలో ఆరో సీడ్‌గా బరిలోకి దిగిన లక్ష్యసేన్‌పై 18-21, 16-21తో ఫ్రెంచ్ షట్లర్ పొపోవ్ విజయం సాధించాడు. పొపోవ్‌పై గతంలో వరుసగా మూడు మ్యాచ్‌లు గెలిచిన లక్ష్యసేన్ ఈ టోర్నీలోనూ గెలుస్తాడని అందరూ ఆశించారు.
కానీ మ్యాచ్ ఆరంభం నుంచే పొపోవ్ బలంగా ఆడాడు. తొలి గేమ్ విశ్రాంతి సమయానికి పొపోవ్ 11-7 ఆధిక్యంతో నిలిచాడు. అయితే సేన్ పుంజుకుని 19-17 ఆధిక్యం సంపాదించాడు. కానీ, పొపోవ్ వరుసగా నాలుగు పాయింట్లు సాధించి తొలి సెట్‌ను కైవసం చేసుకున్నాడు. ఇక రెండో గేమ్ ఈ ఫ్రెంచ్ ఆటగాడికి నల్లేరు మీద నడకలా సాగింది. ఆరంభంలోనే వరుసగా ఐదు పాయింట్లు సాధించి సేన్ మీద ఒత్తిడి తెచ్చాడు. అయితే భారతీయ షట్లర్ నిదానంగా గేమ్‌పై పట్టు సాధించేందుకు ప్రయత్నించాడు. కానీ పొపోవ్ రెండో గేమ్‌ను కూడా సొంతం చేసుకున్నాడు.
