చిరు క్రిస్మస్ ట్రీట్ రెడీ..

దిశ, వెబ్‌డెస్క్: పాపులర్ తెలుగు ఓటీటీ ‘ఆహా’.. సమంతతో ‘సామ్ జామ్’ పేరుతో ఓ స్పెషల్ టాక్ షో రన్ చేస్తున్న విషయం తెలిసిందే. సామ్ చణుకులు, సెలెబ్రిటీ గెస్ట్‌ల సీక్రెట్స్, వేదికపై ఆటపాటలు, భావోద్వేగపు సన్నివేశాలు వెరసి సామ్ జామ్ షో ప్రేక్షకులను అమితంగా ఆకట్టుకుంటోంది. ఇప్పటివరకు విజయ్ దేవరకొండ, రానా, నాగ్ అశ్విన్, తమన్నా ఈ షోలో పార్టిసిపేట్ చేసి విలువైన విషయాలను ఆడియన్స్‌తో పంచుకున్నారు. ఇక ‘ఆహా’ మెగా ఫ్యాన్స్‌కు వరుసగా ట్రీట్ ఇవ్వడానికి సిద్ధపడింది. ఈ షో కోసం సామ్ ఇటీవలే స్టైలిష్ స్టార్ అల్లు అర్జున్‌ను ఇంటర్వ్యూ చేయగా త్వరలోనే ప్రసారం కానుంది. అంతకుముందే సామ్ జామ్ సెట్స్‌లో సందడి చేసిన మెగాస్టార్ పిక్స్ వైరల్ కాగా, చిరు ఎపిసోడ్‌ను క్రిస్మస్ కానుకగా స్ట్రీమింగ్ చేస్తున్నట్లు తాజాగా ప్రోమో విడుదల చేసింది ఆహా.

‘గెట్ రెడీ ఫర్ ది షో.. ద మెగా ఫ్యామిలీ మ్యాన్, ద మెగా ఫ్రెండ్, ద మెగా హ్యుమన్, ద మెగాస్టార్ ఇన్ ఎన్ ఎపిక్ జామ్ సెషన్స్’ అంటూ ఆహా టీమ్ ప్రోమోలో పేర్కొంది. మరి బ్యూటీ డాల్ సామ్, మెగాస్టార్ చిరుకు ఎటువంటి ప్రశ్నలు వేసింది, చిరు భవిష్యత్తులో ఎలాంటి ప్రాజెక్ట్స్ చేయాలనుకుంటున్నాడు, అసలు సామ్ జామ్ సెషన్స్‌‌లో చిరు ఎపిసోడ్ ఎలా డిజైన్ చేశారు వంటి ప్రశ్నలకు సమాధానాలు తెలియాలంటే క్రిస్మస్ వరకు వెయిట్ చేయాల్సిందే. కాగా ఆ ఎపిక్ ఎపిసోడ్ కోసం మెగా అభిమానులు ఆతృతగా ఎదురుచూస్తున్నారు.