విద్యుత్ స్తంభం ఎక్కిన ఆర్టీసీ కండక్టర్
దిశ, హూస్నాబాద్: సిద్దిపేట జిల్లా హుస్నాబాద్ లోని నెహ్రూ మసీదు వద్ద తాగిన మైకంలో బాలు అనే వ్యక్తి విద్యుత్ స్తంభం ఎక్కి కాసేపు హల్ చల్ చేశాడు. విద్యుత్ స్తంభం ఎక్కిన వ్యక్తి ఆర్టీసీ కండక్టర్ గా పనిచేస్తాడని స్థానికులు తెలిపారు. దీనికన్నా ముందు తన భార్యను పుట్టింటికి తీసుకెళ్లిన అత్తపై దాడి చేసి భార్యను కొట్టి నెహ్రూ మసీదు దగ్గర శివాజీ నగర్ రోడ్డు వద్ద గల విద్యుత్ స్తంభం ఎక్కి చనిపోతానని బెదిరించాడు. గమనించిన స్థానికులు వెంటనే విద్యుత్ అధికారులకు ఫోన్ చేసి విద్యుత్ సరఫరాను నిలిపి వేయించారు. పోలీసులకు సమాచారం ఇవ్వడంతో ఘటనా స్థలానికి చేరుకున్న పోలీసులు, స్థానికులు విద్యుత్ స్తంబం ఎక్కిన ఆర్టీసీ కండక్టర్ బాలును సముదాయించి కిందికి దించడంతో ప్రమాదం తప్పింది. ఆర్టీసీ కండక్టర్ బాలు తరచూ తాగుతూ భార్యను కొడుతూ ఉంటాడని స్థానికులు తెలిపారు. విద్యుత్ స్తంభం ఎక్కిన బాలును, అతని భార్య, అత్తను పోలీసులు పోలీస్ స్టేషన్ కు తీసుకెళ్లారు. మొత్తానికి ప్రమాదం తప్పడంతో స్థానికులు ఊపిరి పీల్చుకున్నారు.
