నారా లోకేష్ జగన్ పార్టీ..!
దిశ, ఏపీ బ్యూరో: ఇదేంటని ఆశ్చర్యపోనవసరం లేదు. నిజమే. విపక్ష టీడీపీ జాతీయ కార్యదర్శి ప్రధాన కార్యదర్శి నారా లోకేష్ తనకు తెలయకుండానే సీఎం జగన్కు మేలు చేశారు. దీన్ని ఎవరు అంగీకరించినా.. ఒప్పుకోకపోయినా ఓ సారి జరిగిన ఘటనలను పునశ్చరణ చేసుకుంటే.. నాలుగు రోజుల క్రితం నారా లోకేష్ గుంటూరు జిల్లా వేమూరు నియోజకవర్గంలో ముంపు ప్రాంతాలను పర్యటించారు. నడుముల్లోతు వరద నీళ్లలోకి దిగారు. రైతులతో మమేకమయ్యారు. వాళ్ల కష్టాలను, కన్నీళ్లను చూశారు. తానూ ఓ మనిషే కదా. చలించిపోయారు. ఆవేశంలో “సీఎం జగన్రెడ్డికి అన్నదాతల కష్టాలు పట్టవా.. అంత:పురంలో నీరో చక్రవర్తిలా ఫిడేలు వాయించుకుంటున్నారు. రైతుల కష్టాలు చూడ్డానికి తీరిక లేదా ” అని ప్రశ్నించారు.
మరుసటి రోజు వెంటనే హోంమంత్రితో పాటు సంబంధిత ప్రజా ప్రతినిధులతో అదే నియోజకవర్గంలో పడవలో వెళ్లి పర్యటించారు. బాధితుల కష్టాలను సీఎం దృష్టికి తీసుకెళ్తామన్నారు. గట్టిగా నిలదీసిన వాళ్లను హూంకరించారు. దీన్ని పట్టుకొని నారా లోకేష్ వరదలతో బాధ పడుతున్న ప్రజలను చీదరించుకుంటారా అని నిలదీశారు. చివరకు సీఎం జగన్కు తప్పలేదు. హెలికాప్టర్‌లో వరద ముంపు ప్రాంతాలను పర్యటించారు.
వైసీపీ ప్రభుత్వం ఏర్పడిన తర్వాత టీడీపీ అధినేత చంద్రబాబు నాయుడు ఇప్పటికీ సీఎం నుంచి ఉన్నతాధికారులదాకా ఎన్ని లేఖలు రాశారో మనం చూశాం. ఎన్ని జూమ్ మీటింగులు పెట్టి ఎంత పెద్ద ఎత్తున ప్రభుత్వాన్ని తూర్పారబట్టారో విన్నాం. చివరకు ఆయన సీఎం జగన్పై ఎన్ని నిరాధార ఆరోపణలు చేశారో కూడా కన్నాం. ఏ ఒక్క దానికీ సీఎం జగన్ మోహన్ రెడ్డి స్పందించలేదు. అంతేకాదు. కనీసం చంద్రబాబు ప్రస్తావించిన అంశాలను ఒక్కటి కూడా సీఎం నోటి వెంట రాలేదు. అవుట్డేటెడ్ పొలిటీషియన్తో నాకెందుకులే అనుకున్నట్టుంది. కానీ సీఎం జగన్మోహన్రెడ్డిని నారా లోకేష్ కదిలించారు. ఇప్పటిదాకా తండ్రి చాటు బిడ్డలా పప్పు అనిపించుకుంటున్న నారా లోకేష్ ప్రజల కష్టాలపై వినూత్నంగా స్పందించారు. వరద నీటిలో బాధితులను పరామర్శించారు. దీంతో సీఎంలో కదలిక వచ్చింది.
ఇక ముసిలోడితో పెట్టుకుంటే తన చడ్డీ జారిపోతుందని లోకేష్ భావించి ఉండొచ్చు. అందుకే కదన రంగంలోకి దిగినట్టు కనిపిస్తోంది. లోకేష్ వరద నీళ్లలో పర్యటనతో సీఎం జగన్ స్పందించారు. ఇక ఇలాగే ప్రజా సమస్యలపై లోకేష్ ప్రత్యక్ష పోరాటానికి దిగొచ్చు. జనరేషన్ ప్రభావం కావొచ్చు. చంద్రబాబు విమర్శలకు స్పందించని సీఎం జగన్ లోకేష్ వ్యాఖ్యలకు విలువిస్తున్నట్టు అవగతమవుతోంది. మరక మంచిదే. కాలం చెల్లిన రాజకీయ నాయకులతో అనవసరం. యువకుల మధ్య ఆరోగ్య కరమైన పోటీని ఆహ్వానించాల్సిందే. నవ సమాజపు రాజకీయాలకు ఊపిరులూదాల్సిందే.
