ఎమ్మెల్యే పదవికి రాజీబ్ బెనర్జీ రాజీనామా

కోల్‌కతా: మమతా బెనర్జీ క్యాబినెట్ నుంచి తప్పుకున్న రోజుల వ్యవధిలోనే ఎమ్మెల్యే పదవికీ రాజీబ్ బెనర్జీ రాజీనామా చేశారు. దొంజూర్ అసెంబ్లీ నియోజకవర్గానికి ప్రాతినిధ్యం వహించిన ఆయన తన రాజీనామాను స్పీకర్ బిమన్ బెనర్జీకి సమర్పించారు. కాగా తృణమూల్ కాంగ్రెస్ పార్టీ సభ్యత్వానికీ కూడా రాజీనామా చేసినట్టు తెలిసింది.

పార్టీలో కొందరు నేతలు తన నియోజకవర్గంలో సంక్షేమ కార్యకలాపాలకు అడ్డుతగులుతున్నారని, అందుకే రాష్ట్ర మంత్రిగా తప్పుకుంటున్నట్టు ఈ నెల 22న తన రాజీనామా లేఖలో రాజీబ్ బెనర్జీ పేర్కొన్నారు. టీఎంసీని వీడి బీజేపీలో చేరనున్నారన్న చర్చ జరుగుతున్న తరుణంలో ఆయన తాజాగా ఎమ్మెల్యేగానూ రిజైన్ చేశారు. కేంద్ర హోం శాఖ మంత్రి అమిత్ షా బెంగాల్ పర్యటనకు వెళ్లిన రోజే రాజీబ్ బెనర్జీ రాజీనామా చేయడం గమనార్హం.