నదాల్‌కు షాక్ ఇచ్చిన జ్వెరెవ్
దిశ, స్పోర్ట్స్: వరల్డ్ నెంబర్ 2 ర్యాంకర్, స్పెయిన్ బుల్ రఫెల్ నదాల్‌కు జర్మనీకి చెందిన అలెగ్జాండర్ జ్వెరెవ్ షాకిచ్చాడు. శుక్రవారం రాత్రి జరిగిన మాడ్రిడ్ ఓపెన్ క్వార్టర్‌ఫైనల్‌లో నదాల్ 4-6, 4-6 తేడాతో జ్వెరెవ్‌పై ఓడిపోయాడు. రికార్డు స్థాయిలో 21వ గ్రాండ్ స్లామ్ సాధించాలనుకుంటున్న రఫెల్ నదాల్ ఈ నెలాఖరున రోలాండ్ గారోస్‌లో జరుగనున్న ఫ్రెంచ్ ఓపెన్‌పై కన్నేశాడు. క్లే కోర్ట్ కింగ్ అని పేరొందిన రఫెల్ నదాల్ గత నెలలో మాంటెకార్లో క్వార్టర్స్‌లో ఓడిపోయాడు. తాజాగా మాడ్రిడ్ ఓపెన్‌లో కూడా చేదు ఫలితమే ఎదురయ్యింది.
బార్సిలోనా ఓపెన్ ఫైనల్‌లో కూడా సిట్సిపాస్‌పై అతి కష్టంగా గెలిచి విజేతగా నిలిచాడు. దీంతో రఫెల్ ఫామ్‌పై అందరికీ అనుమానాలు నెలకొన్నాయి. రికార్డు స్థాయిలో 14వ సారి ఫ్రెంచ్ ఓపెన్ గెలిచి 21 గ్రాండ్ స్లామ్ రికార్డును అందుకోవాలిని భావిస్తున్న నదాల్‌కు ఇది షాక్ అనే చెప్పుకోవాలి.
