మరో వివాదంలో బాలీవుడ్ కిలాడీ.. నడిరోడ్డుపై దిష్టిబొమ్మ దహనం
దిశ, వెబ్‌డెస్క్: బాలీవుడ్ స్టార్ హీరో అక్షయ్ కుమార్ మరోసారి వివాదంలో చిక్కుకున్నారు. అక్షయ్ కుమార్ ప్రధాన పాత్రలో తెరకెక్కుతున్న ‘పృథ్వీరాజ్’ సినిమాకు వ్యతిరేకంగా చంఢీగఢ్‌లో ఆందోళనలు చేపట్టారు. యశ్‌రాజ్‌ ఫిల్మ్స్‌ ప్రొడక్షన్‌ నిర్మిస్తున్న ఈ చిత్రానికి టైటిల్‌ మార్చాలని డిమాండ్ చేస్తూ అఖిల భారతీయ క్షత్రియ మహాసభ నేతృ‍త్వంలోని నాయకులు నిరసనలు చేపట్టి అక్షయ్ కుమార్ దిష్టిబొమ్మను దహనం చేశారు. అంతేకాదు సినిమా పేరును మార్చకుంటే మరిన్ని ఆందోళనలు తప్పవని హెచ్చరించారు.
సినిమా పేరు కేవలం ‘పృథ్వీరాజ్’ అని మాత్రమే ఉండకూడదని.. ఆయన పూర్తి పేరు ‘‘హిందూ సామ్రాట్ పృథ్వీరాజ్ చౌహాన్’’ అని కానీ ‘‘చక్రవర్తి పృథ్వీరాజ్ చౌహాన్’’ అని కానీ ఉండాలని డిమాండ్ చేశారు. పృథ్వీరాజ్ చివరి హిందూ చక్రవర్తి అని.. అలాంటప్పుడు ఆయనకు తగిన గౌరవం ఇవ్వాలని కోరారు. అంతేకాకుండా ఈ సినిమా విడుదలకు ముందే క్షత్రియ.. రాజ్ పుత్ సమాజ ప్రతినిధులకు చూపించాలని, అందులో ఏవేమి తప్పులు ఉన్నాయో తెలుస్తుందని తెలిపారు. చిత్రం చరిత్రను దెబ్బతీస్తుందా అనే విషయం తెలిస్తే ముందే ఆ సన్నివేశాలను తొలగించేదుకు కోరవచ్చని అన్నారు.
ఇక ఇలాంటి నిరసనలు బాలీవుడ్ లో కొత్తేమి కాదు గతంలో కూడా ‘పద్మావతి’.. ‘జోధా అక్బర్’ చిత్రాలకు కూడా ఇలాంటి హెచ్చరికలే వచ్చాయి. ఆ విషయాన్ని కూడా క్షత్రియ.. రాజ్ పుత్ సమాజ ప్రతినిధులు ప్రస్తావిస్తూ ఈ సినిమాకు సంబంధించి అన్ని వివాదాలను తొలగించాలని, లేకపోతే ‘పద్మావతి’, ‘జోధా అక్బర్’ సినిమాలకు ఎదురైన పరిస్థితే ఎదుర్కోవాల్సి వస్తుందని హెచ్చరించారు.
