ఆయుధాలు మోస్తున్న పాక్ డ్రోన్‌ను కూల్చిన బలగాలు
న్యూఢిల్లీ: జమ్ము కశ్మీర్‌లోని ఉగ్రవాదులకు పాక్ నుంచి ఆయుధాలను సరఫరా చేస్తున్న ఓ డ్రోన్‌ను భారత బలగాలు శనివారం ఉదయం నేలకూల్చాయి. ఒక ఎం4 రైఫిల్, రెండు మ్యాగజైన్‌లు, పేలుడు పదార్థాలను ఈ డ్రోన్ నుంచి స్వాధీనం చేసుకున్నాయి. పాక్ సరిహద్దు దాటి భారత్ వైపున ఆకాశంలో చక్కర్లు కొడుతున్న ఈ డ్రోన్‌ను ఉదయం 5.10 గంటల ప్రాంతంలో ఓ బీఎస్ఎఫ్ జవాను గుర్తించారు. 250 మీటర్లమేర భారత్ భూభాగంలోకి చొచ్చుకొచ్చిన ఆ డ్రోన్‌పై తొమ్మిది రౌండ్లు కాల్పులు జరపడంతో నేలకూలింది. పాకిస్తానీ ఏజెన్సీలు అలీ భాయ్ అనే ఉగ్రవాదికి ఈ డ్రోన్ ద్వారా ఆయుధాలను చేరవేసేందుకు యత్నించాయని ఓ సీనియర్ పోలీసు అధికారి వెల్లడించారు. అతని పేరే ఆ డ్రోన్‌పై రాసి ఉన్నదని వివరించారు. కశ్మీర్‌ కథువా సెక్టార్‌కు సమీపంలోని పాకిస్తాన్ పికెట్ నుంచి ఈ డ్రోన్‌ను నియంత్రించి ఉండొచ్చని తెలిపారు. జమ్ము రీజియన్‌లో ఇటీవలే ఓ ఎన్‌కౌంటర్‌లో మరణించిన జైషే మహమ్మద్ ఉగ్రవాది నుంచి స్వాధీనం చేసుకున్న ఆయుధాలలాగే ఈ డ్రోన్‌లో లభించిన ఆయుధాలున్నాయని ఓ పోలీసు అధికారి తెలిపారు. జైషే ఉగ్రవాదులను యాక్టివ్ చేసి కశ్మీర్‌లో అశాంతిని సృష్టించాలనే పాకిస్తాన్ భావిస్తున్నదని అన్నారు. కుప్వారా, రజౌరీ, జమ్ము సెక్టార్‌లలో బార్డర్ ద్వారా పలుసార్లు పాకిస్తాన్ ఆయుధాలను స్మగుల్ చేసేందుకు యత్నించగా, వాటిని తిప్పికొట్టామని వివరించారు.
