అన్ని కరోనా వైరస్‌లకు చెక్ పెట్టే టీకాకు ప్లాన్
లండన్: అన్నిరకాల కరోనా వైరస్‌లకు చెక్ పెట్టే సరికొత్త టీకాను ఆక్స్‌ఫర్డ్ యూనివర్సిటీ అభివృద్ధి చేస్తున్నది. ఈ టీకా కేవలం కొవిడ్ 19నే కాదు, భవిష్యత్‌లో జంతువుల నుంచి మానవులకు సోకే ప్రమాదమున్న అన్నిరకాల కరోనా వైరస్‌లను నిలువరించేలా తయారవుతున్నది. ఈ టీకా ట్రయల్స్ కోసం ప్రణాళికలు వేస్తున్నట్టు లండన్‌లోని ఆక్స్‌ఫర్డ్ యూనివర్సిటీ ధ్రువీకరించింది. మనుషులకు సోకిన చాలా రకాల కరోనా వైరస్‌లకు గబ్బిలం మూలమని భావిస్తుంటారు. గబ్బిలం ద్వారా వ్యాపించే వైరస్ సహా ఇతర కరోనా వైరస్‌లనూ కట్టడి చేసేలా డీఐవోఎస్-కొవాక్స్2 టీకా జెనెటిక్ సీక్వెన్స్‌ను అభివృద్ధి చేస్తున్నారు. కొవిడ్ 19ను కలిగించే కరోనా వైరస్ 3డీ కంప్యూటర్ మాడలింగ్ విధానాన్ని తాము అవలంబిస్తున్నారని, సార్స్, మెర్స్ సహా ఇతర అనుబంధ కరోనా వైరస్‌ల సమాచారాన్ని స్వయంగా సమకూర్చుకుంటుందని ప్రొఫెసర్ జోనాథన్ హీనె తెలిపారు.
