దేశంలోని మూడు ప్రధాన నగరాల్లో నీటి కోరత.. నెక్స్ట్ హైదరాబాదేనా..?
దిశ, వెబ్‌డెస్క్: గత నెలరోజులుగా కర్ణాటకలో నీట సమస్య ప్రజలను ఉక్కిరిబిక్కిరి చేసిన విషయం తెలిసిందే. అయితే అక్కడ ఇటీవల కురిసిన అకాల వర్షాల కారణంగా నీటి సమస్య కాస్త తగ్గింది. కానీ వేసవి ఎండలు దంచికొడుతుండటంతో భారత్ లోని మూడు ప్రధాన నగరాలు నీటి సంక్షోభాన్ని ఎదుర్కొంటున్నాయి. తమిళనాడులోని కోయంబత్తూరు, రాజస్థాన్ రాజధాని జైపూర్, మేఘాలయలో ఇటీవల నీటి సమస్య అధికంగా మారింది. పెరుగుతున్న ఈ సమస్యకు శాశ్వత పరిష్కారం చూపాలని నివాసితులు డిమాండ్ చేస్తున్నారు.
కోయంబత్తూరు, జైపూర్‌లు నగరాలు గత కొన్ని వారాలుగా నీటి కొరతను ఎదుర్కొంటుండగా, రాష్ట్రంలో వేడిగాలులు వీస్తున్నందున ఇప్పుడు మేఘాలయపై నీటి కొరత కష్టాలు చుట్టుముడుతున్నాయి. కోయంబత్తూరు సమీపంలోని రిజర్వాయర్లలో నీటి మట్టాలు భారీగా పడిపోతున్నాయి. దీంతో ఆ ప్రాంతంలో నీటి ఎద్దడి నెలకొంది. పరిస్థితి చాలా దారుణంగా ఉంది, కోయంబత్తూరు నగర మున్సిపల్ కార్పొరేషన్ (CCMC) అనేక ప్రాంతాల్లో 15 రోజులకు ఒకసారి నీటిని సరఫరా చేయాలని హెచ్చరికలు జారీ చేసింది. ప్రజలు నీటిని పొదుపుగా వాడుకోవాలని, వచ్చే వరకు నీటిని నిల్వ చేసుకోవాలని కోరారు.
రాజస్థాన్‌లోని జైపూర్‌లో కూడా పరిస్థితి చాలా తీవ్రంగా ఉంది. ఉష్ణోగ్రతలు 40° C మార్కును తాకడంతో, హీట్‌వేవ్ పరిస్థితులు కూడా తీవ్రమవుతున్నాయి. ఒక నివేదిక ప్రకారం.. నీటి ట్యాంకర్లకు డిమాండ్ 10% పెరగడంతో నగరంలో నీటి కొరత ఏర్పడింది. జైపూర్‌లో భూగర్భజలాలు పడిపోయాయని పబ్లిక్ హెల్త్ అండ్ ఇంజనీరింగ్ డిపార్ట్‌మెంట్ (పిహెచ్‌ఇడి) నివేదించింది. IMD ప్రకారం, జైపూర్‌లో గరిష్ట ఉష్ణోగ్రత వచ్చే వారం 42 ° C ఉంటుంది. కాబట్టి ఈ నీటి డిమాండ్ మరింత పెరుగుతుంది. పెరుగుతున్న నీటి డిమాండ్‌తో నీటి ట్యాంకర్ల ధరలు కూడా గణనీయంగా పెరగడంతో నగర వాసులు ఆందోళనకు గురయ్యారు. జైపూర్‌లో సుమారు ₹800 ధర ఉండే వాటర్ ట్యాంకర్ ఇప్పుడు ₹1,000కి అమ్ముతోందని, ఇది మరింత పెరిగే అవకాశం కూడా ఉందని తెలుస్తుంది.
ఇదిలా ఉంటే మండుతున్న ఎండల కారణంగా హైదరాబాద్ నగరంలో కూడా నీటి సమస్య తలెత్తే అవకాశం ఉందని విశ్లేషకులు అంచనా వేస్తున్నారు. ఇప్పటికే నగరానికి నీటిని అందించే రిజర్వయర్లు అడుగంటడంతో సాగర్ నుంచి పుట్టంగండి రిజర్వాయర్ ద్వారా నగరానికి నీటిని తరలిస్తున్నారు. అక్కడ కూడా డెడ్ స్టోరేజ్ ఉండటంతో అధికారులు అప్రమత్తం అయ్యారు. నీటిని పొదుపుగా ఉపయోగించుకోవాలని సూచిస్తున్నారు. అలాగే ముందస్తుగానే ట్యాంకర్లను అందుబాటులోకి తీసుకు వస్తున్నారు. కొన్ని ప్రాంతాల్లో ఇప్పటికే నీటి కొరత పెరగడంతో.. ట్యాంకర్ల ద్వారా నీటిని సరఫరా చేస్తున్నారు. దీంతో వేసవి సమయంలో హైదరాబాద్ లో కూడా నీటి సమస్యలు తలెత్తే అవకాశం ఉందని ప్రజలు భయాందోళనకు గురవుతున్నారు.
