Hamas: యుద్ధం ఆపడానికి కొత్త డీల్‌పై చర్చకు హమాస్ రెడీ
దిశ, నేషనల్ బ్యూరో: గాజాపై యుద్ధాని(Gaza War)కి ఫుల్ స్టాప్ పెట్టడానికి కొత్త డీల్ పై చర్చించడానికి హమాస్(Hamas) సంసిద్ధతను తెలిపింది. మధ్యవర్తుల నుంచి అందిన కొత్త ప్రతిపాదనలను హమాస్ అధ్యయనం చేస్తున్నదని ఓ సీనియర్ హమాస్ అధికారి మంగళవారం తెలిపారు. గాజా పట్టి(Gaza Strip) నుంచి ఆక్రమణల ఉపసంహరణ, శాశ్వత కాల్పులు విరమణ, గాజా ప్రజల వ్యధలకు ముగింపు పలకడానికి ఎలాంటి ఆలోచనలనైనా, ఏ డీల్‌పైనైనా చర్చించడానికి ఉద్యమం సిద్ధంగా ఉన్నదని సమి అబూ జుహ్రి ఓ టీవీ ప్రసంగంలో పేర్కొన్నారు. అలాంటి ఒప్పందం గాజా తీర దిగ్బంధనానికి ముగింపు పలకాలని తెలిపారు. గాజాలోని ఇజ్రాయెల్ బంధీలు, ఇజ్రాయెల్‌లోని పాలస్తీనా ఖైదీలను ఇచ్చిపుచ్చుకునే ప్రక్రియ కూడా సంపూర్ణంగా జరగాలని చెప్పారు. ఇది హమాస్ ఇది వరకే ప్రకటించిన షరతులను పోలి ఉన్నాయి. కాగా, ఇజ్రాయెల్ ప్రధాని బెంజమిన్ నెతన్యాహు మాత్రం హమాస్ నిర్మూలనతోనే యుద్ధం ముగుస్తుందని స్పష్టం చేశారు.
