Baba Siddique: ముంబయిలో బహిరంగంగా మాజీ మంత్రి హత్య.. ఎలా జరిగింది? ఎవరు చేశారు?

దిశ, నేషనల్ బ్యూరో: ఒకప్పుడు అండర్‌వరల్డ్ మాఫియాకు ముంబయి అడ్డా. గ్యాంగ్‌స్టర్లు పతాకస్థాయిలో ఉన్నప్పుడు ముంబయిలో నడిరోడ్డుపైనే బహిరంగంగా అనేక ప్రముఖుల హత్యలు జరిగాయి. ఆ తర్వాత అండర్‌వరల్డ్ క్రమంగా కనుమరుగైంది. అలాంటి ముంబయి మరోసారి ఉలిక్కిపడింది. శనివారం రాత్రి అందరూ దసరా సంబురాల్లో మునిగిన వేళ మాజీ మంత్రి బాబా సిద్ధిఖీ(66) హత్య జరిగింది. తన ఆఫీసు ఎదుటే.. తన కొడుకు ఎమ్మెల్యే జీషన్ సిద్ధిఖీ ఆఫీసు దగ్గరే.. పటాకాలు కాలుస్తుండగా ముగ్గురు నిందితులు వచ్చి బాబా సిద్ధిఖీ మీద కాల్పులు జరిపారు.

ఏం జరిగింది?

మహారాష్ట్ర మాజీ మంత్రి, కాంగ్రెస్‌లో సుదీర్ఘంగా పని చేసిన బాబా సిద్ధిఖీ ఈ ఏడాది ఫిబ్రవరిలోనే అజిత్ పవార్ ఎన్సీపీలో చేరారు. కొడుకు జీషన్ సిద్ధిఖీ ముంబయి కాంగ్రెస్ ఎమ్మెల్యే. బాంద్రాలోని ఖేర్ నగర్‌లో ఎమ్మెల్యే జీషన్ ఆఫీసు బయటే శనివారం రాత్రి 9.30 గంటల ప్రాంతంలో ఈ ఘటన జరిగింది. ముగ్గురు నిందితులు ఆటోలో స్పాట్‌కు వచ్చి బాబా సిద్ధిఖీ కోసం వెయిట్ చేస్తున్నారు. ఆ సమయంలో బాంద్రాలోని తన ఆఫీసు ఎదుట దసరా సందర్భంగా పటాకాలు కాలుస్తుండగా బాబా సిద్ధిఖీపై కాల్పులు జరిపారు. ఆరు రౌండ్లు కాల్పులు జరపగా.. రెండు బుల్లెట్లు ఛాతీలో నుంచి చొచ్చుకెళ్లినట్టు వైద్యులు తెలిపారు. విపరీతంగా రక్తం కోల్పోయిన బాబా సిద్ధిఖీని లీలావతి హాస్పిటల్ ఎమర్జెన్సీ వార్డుకు తరలించారు. అప్పటికే సిద్ధిఖీ పల్స్ పడిపోయింది. గుండె కొట్టుకోవడం లేదు, బీపీ లేదు. వైద్యులు అన్ని రకాల ప్రయత్నాలు చేసినా ఫలితం లేదు. ఐసీయూలోనూ ఆయన ప్రాణాలు నిలపడానికి విశ్వప్రయత్నాలు జరిగాయి. ఫలించకపోవడంతో శనివారం రాత్రి 11.27 గంటల ప్రాంతంలో బాబా సిద్ధిఖీ మరణించినట్టు వైద్యులు ప్రకటించారు. ఆదివారం అధికార లాంఛనాలతో బాబా సిద్ధిఖీ అంత్యక్రియలు పూర్తయ్యాయి. పోలీసులు ముగ్గురు నిందితులు గుర్మేల్ బల్జిత్ సింగ్(23), ఉత్తరప్రదేశ్ బహ్రెచ్ జిల్లాకు చెందిన ధర్మరాజ్ రాజేశ్ కశ్యప్‌, ప్రవీణ్ లొంకార్‌లను అరెస్టు చేశారు. నిందితులకు కోర్టు పోలీసు కస్టడీ విధించింది.

ఎలా జరిగింది?

గుర్మేల్ బల్జిత్ సింగ్, ధర్మరాజ్ కశ్యప్, శివకుమార్‌లు బాబా సిద్ధిఖీని చంపడానికి బాంద్రాకు వెళ్లారు. ముఖాలకు ఖర్చీఫ్‌లు చుట్టుకుని చేతుల్లో పెప్పర్ స్ప్రేలు పట్టుకుని ఆటో దిగారు. బాబా సిద్ధిఖీ ముఖంపై పెప్పెర్ స్ప్రే కొట్టి కాల్పులు జరపాలని అనుకున్నట్టు తెలిసింది. కానీ, ఆటో దిగగానే అక్కడి వారు ఏమీ గమనించకముందే (శివకుమార్ కాల్చినట్టు అనుమానిస్తున్నారు)కాల్పులు జరిపారు. పటాకలు కాల్చుతున్న బాబా సిద్ధిఖీ ఛాతిలో నుంచి రెండు బుల్లెట్లు దూసుకెళ్లాయి. ఆయన కుప్పకూలిపోయాడు. ఆ సమయంలో వెంట ఒక కానిస్టేబుల్ మాత్రమే సెక్యూరిటీగా ఉన్నాడు. వెంటనే ఆయన మరో పోలీసు అధికారి కలిసి నిందితుల వైపు వచ్చారు. ఇద్దరిని పట్టుకున్నారు. శివకుమార్ అక్కడి నుంచి పారిపోయాడు.

ఈ ముగ్గురు షూటర్లకు సహకారం అందించిన నాలుగో నిందితుడు పంజాబ్‌లోని జలంధర్ జిల్లాకు చెందిన మొహమ్మద్ జీషన్ అఖ్తర్‌గా పోలీసులు గుర్తించారు. రూమ్ రెంట్‌కు అరేంజ్ చేయడం, కాల్పులకు ముందు బాబా సిద్ధిఖీ లొకేషన్ వివరాలు వంటి లాజిస్టిక్ సహాకారాలు జీషన్ అఖ్తరే అందించినట్టు అనుమానిస్తున్నారు. ప్రవీణ్ లొంకార్, శుభం లొంకార్‌లు స్క్రాప్ షాపులో పని చేస్తున్న శివకుమార్, ధర్మరాజ్ కశ్యప్‌లను షూటర్లుగా హైర్ చేసుకున్నారు. ఇది ప్రీ ప్లాన్ మర్డర్ అని ముంబయి పోలీసు అధికారులు తెలిపారు. హంతకులకు ముందస్తుగానే రూ. 50 వేల చొప్పున డబ్బులు ముట్టాయి. ఆయుధాలను కూడా ఓ కొరియర్ అందించాడు. కుర్లాలో రూ. 14 వేల కిరాయితో‌ హంతకులు రెంట్‌కు దిగారు. సిద్ధిఖీ కదలికలను కొన్నాళ్లుగా పసిగడుతున్నారు. దసరా నాడు మర్డర్ చేయడానికి ప్లాన్ వేశారు. ఆయనపై కాల్పులకు 9.9 ఎంఎం పిస్టల్ ఉపయోగించారు. పోలీసులు దీన్ని స్వాధీనం చేసుకున్నారు.

బిష్ణోయ్ గ్యాంగ్ పనా?

పంజాబ్‌కు చెందిన మొహమ్మద్ జీషన్ అఖ్తర్(21) నేరపూరిత కేసుల్లో 2022లో అరెస్టై పటియాలా జైలుకు వెళ్లాడు. అక్కడే లారెన్స్ బిష్ణోయ్ గ్యాంగ్‌తో పరిచయ ఏర్పడింది. వారే బాబా సిద్ధిఖీని చంపాలనే కాంట్రాక్ట్‌ను జీషన్ అఖ్తర్‌కు ఇచ్చినట్టు సమాచారం.

ఈ ఏడాది జూన్ 7న జైలు నుంచి విడుదలైన జీషన్ అఖ్తర్ హర్యానాలోని కైతల్‌లో గుర్మేల్ సింగ్‌ను కలిశాడు. గుర్మేల్‌తోపాటు శుభం లొంకార్, ప్రవీణ్ లొంకార్‌లు హైర్ చేసిన ధర్మరాజ్ కశ్యప్, శివకుమార్‌‌లకు రూ. 50 వేల చొప్పున డబ్బులు ఇచ్చి బాబా సిద్ధిఖీని చంపే బాధ్యతను అప్పజెప్పారు. కాగా, ఈ హత్య జరిగిన తర్వాత గ్యాంగ్ స్టర్ లారెన్స్ బిష్ణోయ్ ముఠా సభ్యుడు, నిందితుడు శుభం లొంకార్ సోషల్ మీడియాలో చేసిన పోస్టు వైరల్ అయింది. తామే హత్య చేశామని శుభం అందులో పేర్కొన్నాడు. దీంతో లారెన్స్ బిష్ణోయ్ గ్యాంగే ఈ హత్య చేయించిందా? అనే అనుమానాలు వస్తున్నాయి.

లేక ఇది రాజకీయ, వ్యాపార ప్రత్యర్థుల పనా? స్లమ్ రిహాబిలిటేషన్ కోసం బాబా సిద్ధిఖీ చేస్తున్న ప్రయత్నాలు వ్యతిరేకిస్తూ హత్య చేశారా? అనేది దర్యాప్తు చేస్తామని వివరించారు. స్లమ్ రిహాబిలిటేషన్‌ను వ్యతిరేకిస్తూ 15 రోజుల క్రితమే బాబా సిద్ధిఖీకి బెదిరింపులు వచ్చాయి. పోలీసులు అన్ని కోణాల్దో దర్యాప్తు చేపడుతామని తెలిపారు.

బాబా సిద్ధిఖీ బ్యాక్‌గ్రౌండ్ ఏమిటీ?

1999, 2004, 2009లలో ఎమ్మెల్యేగా గెలిచిన బాబా సిద్ధిఖీ ముంబయిలో ఫేమస్ లీడర్. రాజకీయాల్లో సక్సెస్‌గా కొనసాగిన బాబా సిద్ధిఖీకి బాలీవుడ్ స్టార్లతో సత్సంబంధాలు ఉన్నాయి. సల్మాన్ ఖాన్, షారుఖ్ ఖాన్, సంజయ్ దత్ వంటి అగ్ర ఫిలిం స్టార్లతో దగ్గరి సంబంధాలు ఉన్నాయి. ముఖ్యంగా సల్మాన్ ఖాన్‌కు ఎక్కువ క్లోజ్. బాబా సిద్ధిఖీ పాలిటిక్స్‌లో రాణించడానికి సల్మాన్ కూడా సహకరించారు. ఆయన ఫస్ట్ టైం ఎమ్మెల్యేగా గెలవడానికి సల్మాన్ కృషి ఉన్నట్టు చెబుతారు. సల్మాన్, షారుఖ్‌ల మధ్య సత్సంబంధాలు నెలకొనడానికి కూడా బాబా సిద్ధిఖీ కృషి ఉన్నది. ప్రతి ఏడాది ఈయన గ్రాండ్ ఇఫ్తార్ పార్టీలు ఇస్తారు. ఈ పార్టీలకు రాజకీయ నాయకులు, సినీ సెలెబ్రిటీలు హాజరవుతారు. ముంబయిలో.. ముఖ్యంగా ముస్లింలో బాబా సిద్ధిఖీకి విశేష ఆదరణ ఉన్నది. కరోనా సమయంలో లైఫ్ సేవింగ్ మెడిసిన్స్ సప్లై చేసిన బాబా సిద్ధిఖీ ప్రజల ఆదరాభిమానాలు చూరగొన్నారు.

ఎన్నికల వేళ రాజకీయ దుమారం

వచ్చే నెల మహారాష్ట్ర అసెంబ్లీ ఎన్నికలు జరగనున్నాయి. ఈ తరుణంలో మాజీ మంత్రి హత్య జరగడం రాజకీయ దుమారానికి ఆజ్యం పోసింది. దసరా సందర్భంగా సీఎం షిండే, ప్రతిపక్ష నేత ఉద్ధవ్ ఠాక్రే ప్రసంగాల నేపథ్యంలో ముంబయిలో కట్టుదిట్టమైన భద్రత ఏర్పాటు చేశారు. అయినా.. అదే నాడు మాజీ మంత్రి హత్య జరిగింది. ఇది రాష్ట్రంలోని శాంతి భద్రతలకు నిదర్శనమని ఉద్ధవ్ ఠాక్రే మండిపడ్డారు. మోడీ ప్రభుత్వం, రాష్ట్ర ప్రభుత్వం నేరస్తులపైకాకుండా తమపై నిఘా వేస్తున్నదని విమర్శించారు.