మా పార్టీకే పూర్తి మెజారిటీ.. కర్ణాటక కాంగ్రెస్ అధ్యక్షుడు డీకే శివకుమార్

బెంగళూరు: కర్ణాటక అసెంబ్లీ ఎన్నికల్లో కాంగ్రెస్ పూర్తి మెజారిటీతో అధికారంలోకి వస్తుందని ఆ పార్టీ రాష్ట్ర అధ్యక్షుడు డీకే శివకుమార్ ధీమా వ్యక్తం చేశారు. ఈ సారి జేడీఎస్‌కు కింగ్ మేకర్ అయ్యే అవకాశం ఉండబోదని తెలిపారు. శనివారం ఆయన ఓ మీడియా చానల్‌కు ఇచ్చిన ఇంటర్వ్యూలో మాట్లాడారు. కాంగ్రెస్ 140 స్థానాల్లో గెలిచి ప్రభుత్వాన్ని ఏర్పాటు చేస్తుందని చెప్పారు. సీఎం ఎవరు అనేది హైకమాండ్, ఎమ్మెల్యేలు నిర్ణయిస్తారని వెల్లడించారు. ఏఐసీసీ చీఫ్ మల్లికార్జున్ ఖర్గే పార్టీకి ఆదర్శంగా ఉన్నారని కొనియాడారు. నాయకత్వ లోపం వల్ల బీజేపీ ప్రజల్లో నమ్మకం కోల్పోయిందని విమర్శించారు. అధికారంలోకి వస్తే ఉచిత విద్యుత్, పేదలకు ఉచిత రేషన్, నిరుద్యోగ భృతి, ప్రజలకు ఇచ్చిన ఇతర హామీలను నెరవేరుస్తామని స్పష్టం చేశారు.