Winter Storm : అమెరికాకు ముంచుకొస్తున్న భారీ ముప్పు
దిశ, వెబ్ డెస్క్ : అగ్రరాజ్యం అమెరికా(USA) మరో భారీ ముప్పును ఎదుర్కోబోతోంది. గత పదేళ్ళలో ఎన్నడూ చూడని భారీ మంచు తుఫాను(Winter Storm) అమెరికాను ముంచెత్తనుంది. దాదాపు 15 రాష్ట్రాలకు పైగా భారీ మంచు, వర్షం, అత్యల్ప ఉష్ణోగ్రతలను ఎదుర్కోబోతున్నాయి. 6 కోట్లకు పైగా ప్రజలు ఈ ముప్పు బారిన పడబోతున్నారు. మధ్య అమెరికాలో మొదలైన ఈ భారీ మంచు తుఫాను తూర్పు వైపు కదులుతోంది. మిస్సౌరి నుంచి మధ్య అట్లాంటిక్ వరకు విస్తరించనుందని నేషనల్ వెదర్ సర్వీస్(National Weather Service) వెల్లడించింది. పోలార్ వర్టెక్స్ కారణంగా ప్రతికూల వాతావరణం ఏర్పడనుంది. వారం రోజులపాటు ఉండనున్న ఈ మంచు తుఫాను ప్రాంతాల్లో ప్రయాణాలు అత్యంత ప్రమాదకరం. గడిచిన పదేళ్లల్లో ఇదే అతి తీవ్రమైన తుఫానుగా అక్కడి అధికారులు పేర్కొన్నారు. ప్రజలు అప్రమత్తంగా ఉండాలని, ఎవరూ కూడా ఇళ్ళు దాటి బయటికి రావొద్దని ఇప్పటికే హెచ్చరికలు జారీ చేశారు.
