‘జగదేకవీరుడు అతిలోకసుందరి’ కంటెంట్ ఉపయోగిస్తే చట్టపరమైన చర్యలు: Vyjayanthi Movies
దిశ, సినిమా: తెలుగు చిత్రసీమలో అతిపెద్ద చిత్ర నిర్మాణ సంస్థల్లో ఒకటైన వైజయంతీ మూవీస్.. కాపీ రైట్స్‌కు సంబంధించిన ఓ ప్రకటన విడుదల చేసింది. 1974లో సి.అశ్వనీదత్ స్థాపించిన ఈ సంస్థ అగ్రశ్రేణి సినీ తారలను తీర్చిదిద్దడంతోపాటు భారీ బడ్జెట్ నిర్మాణాలకు ప్రసిద్ధి చెందింది. అయితే ఈ సంస్థ నిర్మాణంలో 1990లో చిరంజీవి, దివంగత నటి శ్రీదేవి జంటగా కె. రాఘవేంద్రరావు తెరకెక్కించిన సోషియో ఫాంటసీ చిత్రం ‘జగదేకవీరుడు అతిలోకసుందరి’.
కాగా ఈ సినిమాకు సంబంధించిన స్టోరీ, సాంగ్స్, క్యారెక్టర్స్‌తోపాటు మూవీ రీమేక్, ప్రీక్వెల్, వెబ్ సిరీస్ ఇతరత్రా ప్రసార చిత్రాల్లో ఏ భాషలోనూ వాడుకోకూడదని పబ్లిక్ నోటీస్ జారీచేసింది సంస్థ. ఒకవేళ సంస్థ అనుమతి లేకుండా ఎలాంటి కంటెంట్ వాడినా కాపీ రైట్స్ కింద చట్టపరంగా సివిల్, క్రిమినల్ కేసులు ఎదుర్కోవాల్సి ఉంటుందని హెచ్చరించింది. ‘మా ‘#జగదేకవీరుడు అతిలోకసుందరి’ కంటెంట్‌ని అనధికారికంగా ఉపయోగిస్తే చట్టపరమైన చర్య తీసుకోబడుతుంది’ అంటూ ట్విట్టర్ వేదికగా నోట్ పోస్ట్ చేయగా.. ప్రస్తుతం వైరల్ అవుతుంది.
