అంతర్జాతీయ ఎమ్మీ అవార్డు ఫంక్షన్‌కు హోస్ట్‌గా తొలి భారతీయ నటుడు..
దిశ, సినిమా: బాలీవుడ్ నటుడు, స్టాండప్ కమెడియన్ వీర్ దాస్ అరుదైన ఘనత సాధించాడు. నవంబర్‌లో న్యూయార్క్ నగరంలో అంగరంగ వైభవంగా జరగబోతున్న ఎమ్మీ అవార్డు వేడుకలకు ఆయన హోస్ట్‌గా ఎంపికయ్యాడు. ఎంతో ప్రతిష్టాత్మకంగా భావించే ఎమ్మీ అవార్డు వేడుకల్లో హోస్ట్‌గా నిర్వహించే తొలి భారతీయ నటుడు వీర్ కావడం విశేషం. ఈ విషయాన్ని ఆయన సోషల్ మీడియా వేదికగా తెలుపుతూ ఓ పోస్ట్ షేర్ చేశాడు.
‘‘ఈ సంవత్సరం భారతీయ ఎమ్మీ అవార్డు వేడుకలకు హోస్ట్‌గా వ్యవహరించబోతున్నాను. మీ మద్దతుకు ధన్యవాదాలు. ఎమ్మీ కార్యక్రమాన్ని హోస్ట్ చేయడానికి నేను వేచి ఉండలేకపోతున్నా! ఇంటర్నేషనల్ ఇండియన్ యాక్టర్ హోస్ట్‌గా కనిపించబోతున్నాడు. ఈ అవకాశం రావడం అదృష్టంగా భావిస్తున్నాను, మీ ప్రేమాభిమానాలకు ధన్యవాదాలు తెలియజేస్తున్నాను’’ అని రాసుకొచ్చాడు. దీంతో ఈ విషయం తెలుసుకున్న సినీ సెలబ్రిటీలు వీర్ దాస్‌కు శుభాకాంక్షలు తెలుపుతున్నారు.
