నటికి ఇళ్లు రాసిచ్చిన అభిమాని.. భయంగా ఉందన్న చిత్ర
దిశ, సినిమా: బోల్డ్ బ్యూటీ చిత్రాంగద సింగ్ ఒక అభిమాని తనకు భయానకమైన అనుభవాన్ని మిగిల్చాడంటోంది. రీసెంట్‌గా ఓ చానెల్‌తో మాట్లాడిన చిత్ర.. తన లైఫ్‌లో విచిత్రమైన ఎక్స్‌పీరియన్స్ ఎదుర్కొన్నట్లు తెలిపింది. అయితే కొన్ని సందర్భాల్లో అవి సౌకర్యంగా, సరదాగా అనిపిస్తే మరికొన్నిసార్లు భయానకమైన ఫీలింగ్ మిగిల్చాయన్న నటి.. అందులో భాగంగా ఓ అభిమాని తన ఇంటిని బహుమతిగా ఇచ్చి షాకిచ్చాడని తెలిపింది. అంతేకాదు ఆ ఇల్లు, స్థలానికి సంబంధించిన భూమి ఒరిజినల్ కాగితాలపై యజమానిగా తనపేరు రాసి ముంబైలోని తన ఇంటికి పోస్ట్ చేసినట్లు చెప్పింది. అయితే ఆ హౌస్, ఏరియా ఎక్కడో తెలియదన్న ఆమె.. ఈ ఊహించని సంఘటనతో చాలారోజులు భయానకంగా బతికినట్లు తెలిపింది. ఇక నటన విషయంలోనూ సినిమాల సంఖ్య చూసుకోనన్న చిత్ర.. తానింకా పూర్తి సామర్థ్యాన్ని వినియోగించలేదని, మేకర్స్ కూడా తనను సరిగా ఉపయోగించుకోలేదని భావిస్తున్నట్లు పేర్కొంది. కాగా సారా అలీఖాన్, విక్రాంత్ మాస్సేతో కలిసి చిత్రాంగద ప్రధానపాత్రలో నటించిన 'గ్యాస్‌లైట్' చిత్రం త్వరలోనే ప్రేక్షకుల ముందుకు రానుంది.
