కేసీఆర్‌పై మోత్కుపల్లి ఆసక్తికర వ్యాఖ్యలు.. అలాంటి ముఖ్యమంత్రిని ఎప్పుడూ చూడలేదు
దిశ, తెలంగాణ బ్యూరో : తన రాజకీయ అనుభవంలో ఎంతో మంది ముఖ్యమంత్రులను చూశాను కానీ, కేసీఆర్ లాంటి వ్యక్తిని ఎన్నడూ చూడలేదని మాజీ మంత్రి మోత్కుపల్లి నర్సింహులు అభిప్రాయాన్ని వ్యక్తం చేశారు. టీఆర్ఎస్పార్టీలో చేరుతున్న సందర్భంగా ఆయన సోమవారం ట్యాంక్ బండ్‌ లోని అంబేద్కర్ విగ్రహానికి , గన్ పార్క్ అమరవీరుల స్థూపానికి నివాళులర్పించారు. అనంతరం మాట్లాడుతూ.. తన జీవితంలో ఈ రోజు సంతోషకరమైనదిగా పేర్కొన్నారు. ప్రాణాలు అర్పించి తెచ్చుకున్న తెలంగాణను బంగారు తెలంగాణగా తీర్చిదిద్దుతున్నందుకే టీఆర్ఎస్ పార్టీలో చేరుతున్నానని క్లారిటీ ఇచ్చారు. దేశ వ్యాప్తంగా ఎక్కడా లేని విధంగా పేదరికాన్ని రూపుమాపేందుకు దళిత బంధు వంటి స్కీంను అమలు చేస్తున్న గొప్ప సీఎం కేసీఆర్ అని వ్యాఖ్యానించారు. రైతులు, పేదలకు ఎన్నో సంక్షేమ పథకాలను అమలు చేస్తున్నారని కొనియాడారు. ఈ కార్యక్రమంలో టీఆర్ఎస్ నాయకులు పిడమర్తి రవి తదితరులు పాల్గొన్నారు.
