డాక్టర్ లేడని.. ఎమ్మెల్యే ఆపరేషన్!

దిశ, వెబ్ డెస్క్: భూమి మీద నూకలుంటే ఎన్ని గండాలున్నా బయటపడొచ్చు. విపత్తు సమయంలో యాదృచ్చికంగా జరిగిన ఓ సన్నివేశం ఇందుకు ఉదాహరణగా నిలుస్తుంది. ఓ మహిళ పురిటి యాతన అనుభవిస్తుంది. అందుబాటులో డాక్టర్లు లేరు. ఏం చేయాలో దిక్కు తోచని స్థితిలో… భూకంప బాధితులను పరామర్శించడానికి వచ్చిన ఎమ్మెల్యే సిజేరియన్ చేసి తల్లీ బిడ్డల్ని కాపాడారు. ఈ ఘటన మిజోరాం రాష్ట్రంలోని చాంఫాయిలో జరిగింది.

ఈ జిల్లా ఇటీవల భూకంపానికి గురైంది. ఈ నేపథ్యంలో బాధితులను పరామర్శించడానికి ఎమ్మెల్యే జీఆర్ థియామ్‌సంగా ఈ ప్రాంతంలో పర్యటించారు. అదే సమయంలో డెలివరీ సమస్య ఎదుర్కొంటున్న 38ఏళ్ల యువతిని ఆయన కలిశారు. సమయానికి డాక్టర్లు అందుబాటులో లేరని తెలుసుకున్న థియామ్‌సంగా.. తానే అత్యవసర సిజేరియన్ చేయడానికి రెడీ అయ్యారు. ఆపరేషన్ సక్సెస్ అవడంతో ఆ మహిళ పండంటి బిడ్డకు జన్మనిచ్చింది. రాజకీయాల్లోకి రావడానికి ముందు థియామ్‌సంగా గైనకాలజీలో స్పెషలిస్ట్ వైద్యునిగా పని చేసేవారు.