‘నాటు నాటు’కు ఆస్కార్.. తమ్మారెడ్డి భరద్వాజ రియాక్షన్ ఇదే..
దిశ, వెబ్ డెస్క్: దర్శకధీరుడు ఎస్ రాజమౌళి దర్శకత్వంలో తెరకెక్కిన ‘ఆర్ఆర్ఆర్’ ఆస్కార్ అవార్డును దక్కించుకోవడం దేశవ్యాప్తంగా పండగ వాతావరణాన్ని తీసుకొచ్చింది. ఈ చిత్రంలోని సెన్సేషనల్ ‘నాటు నాటు’ సాంగ్ కు బెస్ట్ ఒరిజినల్ సాంగ్ విభాగంలో ఆస్కార్ అవార్డు దక్కింది. ఈ నేపథ్యంలో రెండు, మూడు రోజుల కింద కూడా ఆస్కార్ అవార్డుపై చాలా ఉత్కంఠ నెలకొంది. ఈ క్రమంలో నిర్మాత తమ్మారెడ్డి భరద్వాజ ఆసక్తికరమైన వ్యాఖ్యలు చేశారు.
ఆయన కామెంట్లపై చాలా విమర్శలను సైతం ఎదుర్కొన్నారు. ఇక ఇవాళ ‘నాటు నాటు’ సాంగ్ కు ఆస్కార్ అవార్డు దక్కడంపై తమ్మారెడ్డి భరద్వాజ రియాక్షన్ ఎలా ఉంటుందనే దానిపై అందరూ ఆసక్తిగా ఎదురుచూస్తున్నారు. ఈ క్రమంలో తాజాగా తమ్మారెడ్డి భరద్వాజ స్పందించారు. ఓ వీడియో విడుదల చేస్తూ ‘నాటు నాటు’ ఆస్కార్ సాధించడం పట్ల తన అభిప్రాయాన్ని వ్యక్తం చేశారు. ఆయన మాట్లాడుతూ.. ‘నాటు నాటు పాటకు ఆస్కార్ అవార్డు దక్కడం చాలా గర్వంగా ఉంది. నాకే కాదు.. సినిమాను ప్రేమించే వారికి, సంగీతాన్ని ప్రేమించే వారికి ఈ పాటకు ఆస్కార్ దక్కించుకోవడం గర్వించదగ్గ క్షణమేనని అన్నారు.
మనకు తెలుగు సినిమాల్లో తెలుగు సంగీతాన్ని, తెలుగుదనాన్ని అందించే తక్కువ సంగీత దర్శకుల్లో కీరవాణి గారు ఒకరు. అలాగే తెలుగు సాహిత్యం బాగా తెలిసిన చంద్రబోస్, కీరవాణి ఒకటి కావడంతో ఆస్కార్ రావడం సంతోషం. తొలిసారిగా ఇండియన్ సినిమాకు రావడం.. అందులోనూ మన తెలుుగు సినిమాకు ఆస్కార్ రావడం ఆనందంగా ఉంది. ఈ సందర్భంగా కీరవాణి, చంద్రబోస్, ఎస్ ఎస్ రాజమౌళి, ఆర్ఆర్ఆర్ టీమ్ కు హృదయపూర్వక శుభాకాంక్షలను తెలిపారు. ప్రస్తుతం ఈ వీడియో నెట్టింట్లో వైరల్ అవుతోంది.
