క్రైమ్ థ్రిల్లర్ .. 'హిట్' ట్రైలర్

వాల్ పోస్టర్ బ్యానర్‌లో నేచురల్ స్టార్ నాని నిర్మిస్తున్న చిత్రం ‘హిట్’ – ద ఫస్ట్ కేసు ట్యాగ్ లైన్. యంగ్ హీరో విశ్వక్ సేన్ హీరోగా నటిస్తున్నఈ చిత్రం క్రైమ్ థ్రిల్లర్‌గా తెరకెక్కింది. ఇప్పటికే రిలీజ్ అయిన ఫస్ట్ లుక్, టీజర్ భారీ హైప్ క్రియేట్ చేయగా… తాజాగా ట్రైలర్‌ను విడుదల చేసింది మూవీ యూనిట్.

హోమీ సైడ్ ఇన్వెస్టిగేషన్ టీం(హిట్) పోలీస్ ఆఫీసర్ విక్రమ్(విశ్వక్ సేన్).. అదృశ్యమైన ప్రీతి అనే అమ్మాయి ఆచూకీని ఎలా కనుక్కుంటాడనేది కథ. కాగా ప్రీతి హైవే పక్కన నిలబడి ఓ వ్యక్తి కోసం వెయిట్ చేస్తుండగా.. ఇంటికి వెళ్లగలవా అని ఓ పోలీసు ఉన్నతాధికారి అడిగే ప్రశ్నతో ప్రారంభమైంది ట్రైలర్. తర్వాత ప్రీతి అదృశ్యంపై అదే అధికారికి తల్లిదండ్రులు ఫిర్యాదు చేయడం… ఆ కేసును హోమీ సైడ్ ఇన్వెస్టిగేషన్ టీంకు కేటాయించడం జరుగుతుంది. ఈ టీంకు చెందిన విక్రమ్(విశ్వక్ సేన్) ప్రీతి గురించి తెలుసుకునే క్రమంలో ఎలాంటి పరిణామాలు ఎదుర్కొన్నాడు? అసలు ప్రీతి ఎవరి గురించి రోడ్డు పక్కన వెయిట్ చేసింది? అంతకు ముందు రాత్రి ప్రీతి పబ్‌కు వెళ్లినప్పుడు ఏం జరిగింది? అసలు విక్రమ్‌పై అంత భయంకరంగా దాడి చేస్తుంది ఎవరు? మరో వైపు హీరోయిన్ విక్రమ్‌ను ఎందుకు ఆపాలని అనుకుంటుంది? అనే ప్రశ్నలను సంధించారు ట్రైలర్‌లో. అంతకు మించిన ట్విస్ట్‌లతో సినిమాపై ఎక్స్‌పెక్టేషన్స్ పెంచేశారు. ‘హిట్’ ట్రైలర్ హిట్ కాగా… ‘హిట్’ సినిమా సూపర్ హిట్ అవుతుంది అంటూ కామెంట్స్ పెడుతున్నారు నెటిజన్లు. అంతేకాదు ట్రైలర్ హైదరాబాద్‌లో జరిగిన దిశ కేసును తలపిస్తుందని చెబుతున్నారు. ఈ కేసు ఆధారంగానే సినిమా కథ ఉంటుందని అభిప్రాయపడుతున్నారు.