పెళ్లి బృందంపై హిజ్రాల దాడి.. నగ్నంగా మారి రచ్చరచ్చ

దిశ, ఏపీ బ్యూరో: అనంతపురం జిల్లాలో హిజ్రాలు రెచ్చిపోయారు. తాము అడిగినంత డబ్బులు ఇవ్వలేదని ఏకంగా పెళ్లి బృందంపై దాడి చేసి గాయపరిచారు. దీంతో పలువురు ఆస్పత్రిగాయాలపాలయ్యారు. బత్తలపల్లి పోలీసులు తెలిపిన వివరాల ప్రకారం.. మంగళవారం సాయంత్రం బత్తలపల్లి మండలం పోట్లమర్రి సమీపంలో కొందరు హిజ్రాలు వాహనాలను ఆపి బలవంతంగా డబ్బు వసూలు చేస్తున్నారు. అదే సమయంలో నార్పల మండలం బొందలవాడ నుంచి పెళ్లి బృందంతో బొలెరో వాహనం వచ్చింది. హిజ్రాలు దాన్ని ఆపి పెద్ద మొత్తంలో వారి వద్ద నుంచి డబ్బు డిమాండ్‌ చేశారు. అయితే వారు అంత ఇవ్వలేమంటూ కొంత మొత్తాన్ని ఇచ్చారు. తాము అడిగినంత ఇవ్వలేదన్న కోపంతో పెళ్లి బృందంపై రాళ్లతో దాడికి తెగబడ్డారు. ఈ ఘటనలో పెళ్లి బృందంలోని బయన్న, ఈశ్వరమ్మ, ఆంజనేయులు, రామాంజినమ్మ, ఆదెమ్మ, సింహాద్రి, శివయ్య, చిన్న గాయాలపాలయ్యారు.

హిజ్రాల బారినుంచి తప్పించుకున్న పెళ్లి బృందం బత్తలపల్లి పోలీస్‌స్టేషన్‌కు చేరుకుని ఫిర్యాదు చేసింది. అనంతరం గాయపడిన వారు స్థానిక ఆస్పత్రిలో చికిత్స కోసం చేరారు. ఆ తర్వాత పోట్లమర్రికి చేరుకున్న హిజ్రాలు వివస్త్రలుగా మారి రోడ్డుపై పడుకుని ట్రాఫిక్‌కు అంతరాయం కలిగించారు. ఈ విషయం తెలుసుకున్న బత్తలపల్లి పోలీసులు వారిని పంపించి వేశారు. ఆ తర్వాత బత్తలపల్లిలో ప్రయాణికులను దుర్భాషలాడటంతో మళ్లీ పోలీసులు వారిని స్టేషన్‌కు తరలించి కౌన్సెలింగ్‌ ఇచ్చారు. బాధితుల ఫిర్యాదు మేరకు కాశి, లావణ్య, మురళి, దుర్గ, శ్యామలపై కేసు నమోదు చేసినట్లు పోలీసులు తెలిపారు.