పోలీస్ కావాలనుకుంటున్నారా.. మీ కోసమే ఈ గుడ్‌ న్యూస్

దిశ, కామేపల్లి : ఉమ్మడి ఖమ్మం జిల్లాలో పోలీస్ ఉద్యోగ నియామకాలకు సంబంధించి ఉచిత శిక్షణ తరగతులను నిర్వహించనున్నట్టు కామేపల్లి ఎస్సై జి. స్రవంతి తెలిపారు. బుధవారం కామేపల్లి పోలీస్ స్టేషన్‌లో ఏర్పాటు చేసిన విలేకర్ల సమావేశంలో ఆమె మాట్లాడుతూ.. ఖమ్మం పోలీస్ కమిషనర్ శ్రీ విష్ణు ఎస్ వారియర్ ఆదేశానుసారం కామేపల్లి మండలంలో నిరుద్యోగ యువతీ, యువకులకు పోలీస్ ఉద్యోగ నియామకాలకు ఉచిత శిక్షణ తరగతులను నిర్వహించనున్నట్లు వెల్లడించారు.

పోలీస్ ఉద్యోగాలకు దరఖాస్తు చేసుకున్న యువతీ, యువకులు తమ పదవ తరగతి, ఇంటర్, డిగ్రీ ఉత్తీర్ణత ధ్రువీకరణ పత్రాలతో పాటు ఆధార్ కార్డు జిరాక్స్ కాపీలను జతపరిచి కామేపల్లి పోలీస్ స్టేషన్ లో దరఖాస్తు చేసుకోవాల్సిందిగా కోరారు. ఈ అవకాశాన్ని నిరుద్యోగ యువతీ, యువకులు సద్వినియోగం చేసుకోవాలని ఎస్ఐ జి.స్రవంతి తెలిపారు.