చూ మంత్రంతో కరోనా ఫట్..!

దిశ, క్రైమ్‌బ్యూరో: ప్రపంచాన్ని అల్లకల్లోలం చేస్తున్న కరోనా వైరస్‌ను అరికడతానంటూ అమాయక ప్రజలను బురిడీ కొట్టిస్తున్న వ్యక్తిని పోలీసులు అరెస్టు చేశారు. బాధితుల నుంచి వేలకు వేలు దండుకుంటున్న విషయాన్ని తెలుసుకున్న పోలీసులు.. పక్కా సమాచారంతో దొంగ బాబాను పట్టుకున్నారు. మియాపూర్ ఇన్‌స్పెక్టర్ వెంకటేష్ తెలిపిన ప్రకారం వివరాలిలా ఉన్నాయి. హాఫీజ్‌పేట మార్తాండనగర్‌లో నివసించే ఇస్మాయిల్ అతీత శక్తులు ఉన్నాయంటూ ప్రజలను నమ్మించి క్షుద్ర పూజలు నిర్వహిస్తూ ప్రజల వద్ద డబ్బు లాగాడు. ప్రజలకు సాధారణ జలుబు, దగ్గు ఉన్నా కరోనా ఉన్నట్టు భయానికి గురిచేస్తూ… మంత్రాలు, శక్తులతో నయం చేస్తానని చాలామంది నుంచి వేలకు వేలు దండుకున్నాడు.

ఇదే క్రమంలో హఫీజ్‌పేటకు చెందిన ఓ బాధితుడికి కరోనా లక్షణాలు ఉన్నాయని, మంత్ర శక్తుల ద్వారా తగ్గిస్తానంటూ మాయమాటలు చెప్పి, రూ.40 వేలను వసూలు చేశాడు. అనుమానం వచ్చిన అతడు మియాపూర్ పోలీసులకు ఫిర్యాదు చేయగా ఇన్‌స్పెక్టర్ వెంకటేష్ నేతృత్వంలో ఇస్మాయిల్ బాబా ఇంటిపై దాడి చేశారు. దాదాపు 30మందితో సమావేశమై క్షుద్ర పూజలకు సంబంధించిన అంశాలను చర్చిస్తుండగా పోలీసులు అదుపులోకి తీసుకున్నారు. ఒక్కొక్కరిని నుంచి రూ.40 నుంచి 50 వేలు వసూలు చేసినట్టు పోలీసులు గుర్తించారు.