జ్వలించే నిప్పుకణిక భగత్ సింగ్

వారు నన్ను చంపవచ్చు. కానీ వారు నా ఆలోచనలను చంపలేరు. వారు నా శరీరాన్ని దహించగలరు. నా ఆత్మను దహించలేరు అన్నాడు భగత్ సింగ్, రవి అస్తమించని సామ్రాజ్యాన్ని ఏర్పాటు చేసి తమకు ఎదురు లేదంటున్న బ్రిటిష్ సామ్రాజ్యానికి ఎదురు నిలిచి దేశమాత విముక్తి కోసం విజయం, వీరమరణం అంటూ యువతను ఉత్తేజపరిచి తప్పించుకునే మార్గాలు మిక్కుటంగా ఉన్నా పిరికితనం చూపక ధైర్యంగా పట్టుబడి ఉరికొయ్యలను ముద్దాడిన మహోన్నత వ్యక్తి , మహోన్నత విప్లవకారుడు సర్దార్ భగత్ సింగ్. భగత్ సింగ్ అనే పేరు వినగానే నరాల్లో నెత్తురు ఉడుకుతుంది. రోమాలు నిక్కబొడుచుకుంటాయి. స్వాతంత్ర్య ఉద్యమంలో రాజీలేని పోరాటం చేసిన భగత్ సింగ్ గాంధీ అహింసా పోరాటాన్ని వ్యతిరేకించారు. హింసా మార్గంలోనే స్వాతంత్ర్యం సిద్ధిస్తుందని నినదించాడు.

అహింసతో పాటు హింసా ఉండాలంటూ..

భగత్ సింగ్ ప్రస్తుతం పాకిస్థాన్‌లో ఉన్న పంజాబ్ ప్రాంతంలోని ఖత్కర్ కలాన్ అనే గ్రామంలో 1907, సెప్టెంబరు 28న జన్మించాడు. అతని తల్లిదండ్రులు కిషన్ సింగ్, విద్యావతి. భగత్ సింగ్ తాత అర్జున్ సింగ్ స్వామి దయానంద సరస్వతికి అనుచరుడు. ఆయన ప్రభావం భగత్‌పై బాగా ఉండేది. పదమూడేళ్ల ప్రాయంలో మహాత్మాగాంధీ సహాయ నిరాకరణోద్యమం కూడా భగత్‌పై విపరీత ప్రభావం చూపింది. భగత్ సింగ్ మూడేళ్ళ పిల్లాడిగా ఉన్నప్పుడే పొలంలో గడ్డిపరకలు నాటుతూ తుపాకులు నాటుతున్నాను... చెట్టు పెరిగి తుపాకులు కాస్తాయనేవాడు. మొలకలు వేసి తుపాకులను మొలకెత్తించాలని చూడడం అతని వ్యక్తిత్వానికి మచ్చుతునక.

ఆయన బాబాయి సర్దార్ అజిత్ సింగ్ ఆంగ్లేయులతో పోరాడుతూ మరణిస్తే కన్నీరు పెట్టుతున్న చిన్నమ్మను చూసి నాలుగేళ్ళ భగత్ సింగ్ ‘పిన్ని ఏడవొద్దు.. నేను ఆంగ్లేయులపై ప్రతీకారం తీర్చుకుంటా’ అని ప్రతిజ్ఞలు చేసేవాడు. గాంధీ చేపట్టిన సహాయ నిరాకరణ ఉద్యమంలో ప్రత్యక్షంగా మొదటిసారి పాల్గొన్నాడు. ప్రభుత్వ పుస్తకాలను, విదేశీ దుస్తులను తగులబెట్టాడు. అయితే గాంధీ చేపట్టిన అహింసా ఉద్యమం వల్లే కాకుండా, హింసాత్మక ఉద్యమంతో కూడా బ్రిటిష్ వారి ఆగడాలకు చెక్ పెట్టాలన్న ఆలోచనలో ఉండేవాడు. 1919 లో జరిగిన జలియన్ వాలాబాగ్ దురంతం అతనిలో బ్రిటిష్ వారి పట్ల కోపాన్ని మరింత పెంచింది.

యుక్త వయసుకు వచ్చాక ఆయనకి పెళ్లి చేసేందుకు కుటుంబ సభ్యులు ప్రయత్నించగా, నా జీవితం దేశానికి అంకితం చేయాలనుకుంటున్నాను. నాకు ఇంకే కోరిక లేదని ఉత్తరం రాసి ఇంటి నుండి పారిపోయాడు. అలా ఇంటి నుంచి పారిపోయి నవ జవాన్ భారత సభ అనే సంఘంలో చేరాడు. ఆ సంఘం ద్వారా యువకులను ఆకర్షించి స్వాతంత్య్రోద్యమ సాధనకు పురికొల్పాడు. అనంతరం హిందూస్థాన్ గణతంత్ర సంఘంలోనూ చేరాడు. అక్కడే అతనికి సుఖ్‌దేవ్ పరిచయమయ్యాడు. ఇద్దరు అనతి కాలంలోనే ఆ సంఘానికి నాయకులయ్యారు.

ఉరిశిక్ష పడుతుందని తెలిసినా..

బ్రిటిష్ ప్రభుత్వంపై హింసాత్మక ఉద్యమానికి సిద్ధమయ్యారు. అదే సమయంలో సైమన్ కమిషన్‌కు వ్యతిరేకంగా దేశంలో సైమన్ గో బ్యాక్ ఉద్యమాన్ని స్వాతంత్య్ర ఉద్యమకారులు తీవ్రంగా అడ్డుకున్నారు. అందులో భాగంగా లాహోర్‌లో లాలా లజపతి రాయ్ బ్రిటిష్ సాయుధ బలగాలను ఎదురొడ్డి నిలిచారు. సూపరింటెండెంట్‌ సాండర్స్ లాఠీతో లాలా లజపతిరాయ్‌పై విరుచుకుపడ్డాడు. తల పగలగొట్టాడు, ఛాతీపైనా గాయమైంది. దీంతో పంజాబ్ కేసరి నేల కొరిగాడు. ఆయన మరణం భగత్ సింగ్, సుఖ్ దేవ్, రాజ్‌గురులలో ఆగ్రహాన్ని నింపింది. ఆ తర్వాత సాండర్స్‌ను కసి తీరా కాల్చి చంపారు. ఆ హత్యకు కారణమైన వారిని ఉరితీయాలని బ్రిటిష్ ప్రభుత్వం నిర్ణయించింది. ఆ తర్వాత 1929లో పార్లమెంటులోపై బాంబులు విసిరారు. అనంతరం ముగ్గురు లొంగిపోతే వారిపై బ్రిటిష్ ప్రభుత్వం సాండర్స్ హత్యా నేరం మోపింది. కోర్టు వారికి ఉరిశిక్ష విధించింది.

ఉరికంబాన్ని ఎక్కే కొద్ది రోజుల ముందు భగత్ సింగ్ తన తల్లితో ‘నేను చనిపోతే దేశానికి అదో ఉత్పాతంగా మిగిలిపోతుంది. నేను నవ్వుతూ మృత్యువుని అల్లుకుంటే భారతదేశంలో వున్న మాతృమూర్తులు అందరూ తమ బిడ్డలు భగత్ సింగ్‌లా కావాలని కోరుకుంటారు. బలీయమైన స్వాతంత్య్ర కాంక్ష వున్న సమరయోధులు అసంఖ్యాకంగా ఉద్భవిస్తారు. అప్పుడే విప్లవ యోధులు సాగిస్తున్న పోరాటాన్ని నిలువరించడం దుష్ట శక్తులకు సాధ్యం కాదన్నారు. దీనికి ఆయన తల్లి ‘ప్రతి ఒక్కరూ ఎప్పుడో ఒకప్పుడు చనిపోవలసిందే. గొప్ప మరణం అనేది ఎలా వుంటుందంటే ప్రపంచమంతా ఆ మరణం గురించే చెప్పుకుంటుంది’ అన్నారు. ఉరి కొయ్యని ముద్దాడే ముందు భగత్ సింగ్ చివరిసారి ఇచ్చిన నినాదం ఇంక్విలాబ్ జిందాబాద్. ఇంక్విలాబ్ జిందాబాద్ అంటూ ఆ ముగ్గురు యోధులు ఉరి కొయ్యను ముద్దాడారు. 25 ఏళ్ళ వయసులోనే ఉరిశిక్ష పడుతుందని తెలిసినా భగత్ చేసిన సాహసం అసామాన్యం. ఇప్పటి యువత, రాజకీయ నాయకులు భగత్ సింగ్‌ని కచ్చితంగా ఆదర్శంగా తీసుకోవాలి.

(నేడు భగత్ సింగ్ జయంతి)

సభావట్ కళ్యాణ్

ఏబీవీపీ రాష్ట్ర నాయకులు

90143 22572