కరోనా ప్రభావం.. వాయిదా లిస్టులోకి చేరిన 'విరాట పర్వం'
దిశ, వెబ్ డెస్క్: కరోనా కారణంగా కుదేలైన చిత్ర పరిశ్రమ ఇప్పుడిప్పుడే తేరుకుంటుంది అనే సమయంలో కరోనా సెకండ్ వేవ్ మళ్లీ విజృంభించింది. దీంతో మరోసారి చిత్ర పరిశ్రమకు బాధలు తప్పేలా లేవు. ఇప్పటీకే విడుదల కావాల్సిన సినిమాలను దర్శక నిర్మాతలు వాయిదా వేస్తూ వస్తున్నారు. స్టార్ హీరోలు సైతం ఈ కరోనా దెబ్బకు వెనక్కి తగ్గుతున్నారు. ఏప్రిల్ లో స్టార్ హీరోల సందడి ఉంటుంది అనుకొనేలోపు ఒక్కొక హీరో తమ సినిమాను వాయిదా వేసుకుంటూ వస్తున్నారు. కరోనా ప్రభావం కారణంగా, ప్రేక్షకుల ఆరోగ్య రీత్యా ‘టక్ జగదీష్’, ‘లవ్ స్టోరీ’ వంటి సినిమాలు వాయిదా పడినట్లు చిత్ర బృందం అధికారికంగా ప్రకటించింది.
ఇక తాజాగా ఈ వాయిదా లిస్టులోకి రానా ‘విరాటపర్వం’ కూడా చేరిపోయింది. తమ సినిమా విడుదల వాయిదా పడినట్లు చిత్ర బృందం ట్విట్టర్ వేదికగా అభిమానులకు తెలియజేసింది. “కరోనా సెకండ్ వేవ్ కారణంగా ఏప్రిల్ 30 న విడుదల కావాల్సిన ‘విరాట పర్వం’ సినిమాను వాయిదా వేస్తున్నాం.. త్వరలోనే కొత్త రిలీజ్ డేట్ ని ప్రకటిస్తాం” అంటూ తెలిపింది. రానా, సాయి పల్లవి జంటగా వేణు ఉడుగుల దర్శకత్వంలో తెరకెక్కిన ఈ సినిమా ఈ నెల 30 న విడుదల కానున్న విషయం తెల్సిందే.
