రాఘవేంద్రరావు ఇంట విషాదం

దిశ, వెబ్‌డెస్క్: టాలీవుడ్ సీనియర్ డైరెక్టర్ రాఘవేంద్రరావు ఇంట తీవ్ర విషాదం చోటుచేసుకుంది. రాఘవేంద్రరావు అన్న, ప్రముఖ నిర్మాత కృష్ణమోహన్ రావు తుదిశ్వాస విడిచారు. గత కొంతకాలంగా ఊపిరితిత్తుల సమస్యతో బాధపడుతున్న ఆయన.. ఇవాళ తన నివాసంలో కన్నుమూశారు. ఆయన వయస్సు 81 సంవత్సరాలు.

ఆర్.కె అసోసియేట్స్ సంస్థను ప్రారంభించిన కృష్ణమోహన్ రావు.. గతంలో పలు సినిమాలకు నిర్మాతగా వ్యవహరించారు. భలేకృష్ణుడు, అపూర్వ సహోదరులు, యుద్ధభూమి, అల్లరి మెగుడు, ముద్దుల ప్రియుడు, ఘరనాబుల్లోడు సినిమాలను కృష్ణమోహన్ రావు నిర్మించారు.

కృష్ణమోహన్ రావు మృతితో రాఘవేంద్రరావు ఇంట్లో విషాదఛాయలు అలుముకున్నాయి. ఆయన మృతికి పలువురు సినీ ప్రముఖులు సంతాపం ప్రకటించారు. ‘నా సోదరుడు, దర్శకుడు రాఘవేంద్రరావు గారి అన్నగారు కృష్ణమోహన్ గారి మరణవార్త విని నా మనస్సు చలించిపోయింది. ఆయన ఆత్మకు శాంతి చేకూరాలని కోరుతూ.. ఆ కుటుంబానికి నా ప్రగాఢ సంతాపాన్ని తెలియచేస్తున్నాను’ అని హీరో మోహన్ బాబు ట్వీట్ చేశారు.