ఆశ్చర్యం.. శునకానికి బిడ్డగా మారిన మేకపిల్ల

దిశ, అచ్చంపేట: ప్రస్తుత ఆధునిక సమాజంలో మనుషుల్లో మానవత్వం, ప్రేమానురాగాలు, సత్సంబంధాలు ఇలా చెప్పుకుంటూ పోతే శతృత్వం పెరుగుతుందే తప్పా.. కలిసి ఉండలేకపోతున్న సందర్భాలు, సంఘటనలు కోకొల్లలు. తల్లి పిల్లలను వేరుచేయడం, నవమాసాలు మోసి పుట్టిన బిడ్డను కూడా అమానుషంగా వదిలేస్తున్న సంఘటనలు ప్రతి రోజూ ఎక్కడో ఒకచోట చూస్తూనే ఉన్నాం.

కానీ, మూగజీవాలలో జాతి వైరుధ్యాలు వేరు వేరు అయినప్పటికీ.. జ్ఞానం ఉన్న మనుషుల కంటే జ్ఞానం లేని మూగజీవాలు మెరుగని కొన్ని సంఘటనలు మానవాళి ఆలోచనకు భిన్నంగా కనిపిస్తుంటాయి. అలాంటి సంఘటన నాగర్ కర్నూలు జిల్లా అమ్రాబాద్ మండలం కొత్తపల్లి గ్రామంలో బుధవారం చోటు చేసుకుంది. ఓ రైతుకు చెందిన మేకపిల్ల తన జాతి వైరుధ్యాన్ని మరిచి వ్యవసాయ పొలంలో ఉన్న శునకం దగ్గరికి వెళ్లి పాలు తాగింది. ఈ వింత దృశ్యాలను సదరు రైతు మొబైల్‌లో చిత్రీకరించగా.. పలువురు యువకులు సోషల్ మీడియాలో అప్‌లోడ్ చేశారు. ప్రస్తుతం ఈ వీడియో తెగ వైరల్ అవుతోంది.