ఉరి వేసుకొని ఉత్తర్ ప్రదేశ్ వాసి మృతి
దిశ, పరిగి : ఉరి వేసుకొని ఉత్తర్ ప్రదేశ్ వాసి మృతి చెందినట్లు పరిగి ఎస్ఐ సంతోష్ కుమార్ తెలిపారు. ఉత్తర్ ప్రదేశ్ రాష్ట్రానికి చెందిన మోహిత్ కుమార్ (31) పరిగి మండలం మాదారం గ్రామంలోని పవన్ ప్లైవుడ్ ఫ్యాక్టరీలో 20 రోజులుగా దినసరి కూలీగా పనిచేసేందుకు వచ్చాడు. మోహిత్ ఉత్తర్ ప్రదేశ్ లో ఉన్నప్పుడు ఓ మైనర్ బాలిక కేసులో రెండేళ్లు జైలు శిక్ష అనుభవించి వచ్చాడు. ఆర్థికంగా ఇబ్బందులు ఎదుర్కోవడంతో ఫ్లై వుడ్ ఫ్యాక్టరీలో పని చేసేందుకు వచ్చాడు. ఇక్కడికి వచ్చినప్పటి నుంచి ఎవరితో సరిగ్గా మాట్లాడకుండా ఉంటూ తాగుడుకు బానిస అయ్యాడు. ఇందులో భాగంగానే సోమవారం రాత్రి 9 గంటలకు మద్యం బాటిల్ తెచ్చుకొని తాగాడు. మద్యం సేవించి ఎంత సేపటికి తలుపులు తెరవడం లేదంటూ తన తమ్ముడైన సాహిత్ కుమార్ కు అనుమానం వచ్చి చూడగా మోహిత్ ఉరి వేసుకుని ఉన్నట్లు గుర్తించారు. వెంటనే ఫ్యాక్టరీ యాజమాన్యానికి, పోలీసులకు సమాచారం అందించారు. మృతుడి తమ్ముడు సాహిత్ ఫిర్యాదు మేరకు కేసు నమోదు చేసుకొని మృతదేహానికి పోస్టుమార్టం నిర్వహించి స్వగ్రామానికి తరలించినట్లు ఎస్ఐ సంతోష్ కుమార్ తెలిపారు.
