రెచ్చిపోతున్న డీజిల్ దొంగలు..
దిశ, భిక్కనూరు : డీజిల్ దొంగలు పేట్రేగిపోతున్నారు. వారం పది రోజుల క్రితం హైవే పక్కన ఆగి ఉన్న లారీలో నుంచి డీజిల్ దొంగతనం చేసిన ఘటన మరువకముందే, తాజాగా హైవే పక్కన ఆగి ఉన్న లారీలో నుంచి డీజిల్ దొంగిలించిన సంఘటన కామారెడ్డి జిల్లా భిక్కనూరు టోల్ ప్లాజా సమీపంలో ఆదివారం వేకువజామున చోటుచేసుకుంది. వివరాల్లోకి వెళితే యూపీ నుంచి హైదరాబాద్ వైపు వెళ్తున్న ట్రాలీ లారీ బ్యాటరీ పేలి రోడ్డు పై ఆగిపోయింది. దీంతో ట్రాఫిక్ జామ్ కాకుండా వెంటనే వేరే లారీ సహాయంతో రోడ్డు పక్కకు చేర్చారు.
బ్యాటరీ పేలిన లారీలోనే డ్రైవర్ క్లీనర్ నిద్రకు ఉపక్రమించడంతో, కారులో వచ్చిన దుండగులు ట్యాంక్ మూత తీసి డీజిల్ దొంగిలించుకుపోయారు. మహారాష్ట్రలోని నాగపూర్ లోని పెట్రోల్ బంక్ లో 15 వేల రూపాయల డీజిల్ పోయించుకొని వచ్చానని డ్రైవర్ చెప్తున్నాడు. ప్రస్తుతం 300 లీటర్ల డీజిల్ దొంగిలించుకుపోగా, వారం పది రోజుల క్రితం బస్వాపూర్ శివారులోని హైవే పై ఆగి ఉన్న లారీలో నుంచి 500 లీటర్ల డీజిల్ దొంగిలించుకుపోయారు. వరుస డీజిల్ దొంగతనాలతో హైవే పై పార్క్ చేసి ఉంచేందుకు వాహనదారులు భయపడి పోవలసిన పరిస్థితి తలెత్తింది.
