మహారాష్ట్ర బ్యాంకు ఏటీఎంలో చోరీ.. అతని పైనే అనుమానం..?
దిశ, కూకట్పల్లి: కేపీహెచ్బీ పోలీస్ స్టేషన్ పరిధి కేపీహెచ్బీకాలనీ మూడవ ఫేజ్లోని బ్యాంక్ ఆఫ్ మహారాష్ట్ర ఏటీఎంలో చోరి జరిగింది. శుక్రవారం అర్ధరాత్రి 2:45 గంటలకు ఓ గుర్తు తెలియని వ్యక్తి ఏటీఎం లోపలికి ప్రవేశించి నకిలీ తాళం చెవితో ఏటీఎం బాక్స్ను తెరిచి అందులోని 5 లక్షల రూపాయలను దొంగిలించి పరారయ్యాడు. శనివారం తెల్లవారుజామున స్థానికులు గమనించి పోలీసులకు సమాచారం అందించడంతో సంఘటన స్థలానికి చేరుకున్న పోలీసులు వివరాలు సేకరించారు.
సీసీ కెమెరా పుటేజీలో ఉన్న వ్యక్తి బ్యాంక్లో డబ్బులు డిపాజిట్ చేసే వాహనంతో పాటు ఉండే సిబ్బందిగా గుర్తించినట్లు సమాచారం. పని చేస్తున్న కంపెనీనే మోసం చేసి ఏటీఎం నకిలీ తాళం చెవిని తయారు చేసుకుని పథకం ప్రకారం డబ్బులు దొంగిలించినట్టు సమాచారం. కాగా నిందితుడిని బాలానగర్ సీసీఎస్ పోలీసులు విచారిస్తున్నట్లు తెలిసింది. పథకం ప్రకారం చోరికి పాల్పడిన దొంగ ఏటీఎంలోని సీసీ కెమెరాలకు చిక్కడంతో బ్యాంకు సిబ్బంది గుర్తించి పోలీసులకు తెలిపారు.
