ఉలిక్కిపడ్డ రఘునాథపురం.. గ్రామంలో రైతు దారుణ హత్య

దిశ, రాజాపేట : యాదాద్రి భువనగిరి జిల్లా రాజాపేట మండలం రఘునాథపురంలో దారుణం జరిగింది. శనివారం ఉదయం రఘునాథపురం గ్రామానికి చెందిన మజ్జిగ యాదగిరి అనే రైతుపై అదే గ్రామానికి చెందిన వడ్లకొండ నాగరాజు కర్రతో దాడి చేసి తీవ్రంగా గాయపరిచాడు. ఆ దెబ్బలకు తాళలేక యాదగిరి అక్కడికక్కడే మృతి చెందాడు. సమాచారం అందుకున్న యాదగిరిగుట్ట ఏసీపీ, సీఐ, ఎస్ఐ హూటాహుటిన రఘునాథపురం చేరుకుని విచారణ చేపట్టారు. సంఘటన స్థలాన్ని పరిశీలించి హత్య జరిగిన తీరును పరిశీలించారు. గ్రామస్తుల సహకారంతో మర్డర్ చేసిన నాగరాజును అదుపులోకి తీసుకున్నారు. కాగా, ప్రశాంతంగా ఉన్న గ్రామంలో ఒక్కసారిగా మర్డర్‌ జరగడంతో గ్రామస్తులు ఉలిక్కిపడ్డారు. అయితే నాగరాజు ఇటీవల సైకోలా ప్రవర్తిస్తున్నాడని గ్రామస్తులు ఆరోపిస్తున్నారు. ఈ హత్యపై పూర్తి వివరాలు తెలియాల్సి ఉన్నది.