టీఆర్ఎస్ కార్పొరేట‌ర్ రాజీనామా
దిశ ప్ర‌తినిధి, వరంగల్ : వరంగల్ కార్పొరేష‌న్‌లో 37వ డివిజ‌న్‌కు ప్రాతినిధ్యం వ‌హిస్తున్న టీఆర్ఎస్ కార్పొరేట‌ర్ కోర‌బోయిన సాంబ‌య్య త‌న ప‌ద‌వికి రాజీనామా చేశారు. ఈమేర‌కు శ‌నివారం సాయంత్రం ప్ర‌భుత్వ చీఫ్‌విప్‌, ప‌శ్చిమ నియోజ‌క‌వ‌ర్గ ఎమ్మెల్యే విన‌య్‌భాస్క‌ర్‌కు సుధీర్ఘ లేఖ రాశారు. 2001 పార్టీ ఆవిర్భావం నుంచి తాను టీఆర్ ఎస్‌లో ప‌నిచేస్తున్నాన‌ని పేర్కొన్నారు. గ‌త ఎన్నిక‌ల్లో మేయ‌ర్ ప‌ద‌వి ఆశించినా ద‌క్క‌లేద‌ని అన్నారు. అయితే ప్ర‌స్తుతం పార్టీలో ప‌నిచేసిన‌వారి కంటే ప‌ని చేయ‌ని వారికే ఎక్కువ ప్రాధాన్యం ద‌క్కుతోంద‌ని అందుకే పార్టీని వీడుతున్న‌ట్లుగా పేర్కొన్నారు.
బీజేపీలో చేరేందుకు రంగం సిద్ధం..?
విన‌య్‌భాస్క‌ర్‌కు అత్యంత స‌న్నిహితుల్లో సాంబ‌య్య ఒక‌రు. సాంబ‌య్య పార్టీని వీడుతున్న‌ట్లుగా కొంత‌కాలంగా వార్త‌లు వినిపిస్తున్నాయి. బీజేపీలో చేరేందుకు రంగం సిద్ధం చేసుకున్న‌ట్లుగా తెలుస్తోంది. త్వ‌ర‌లో బండి సంజ‌య్ వరంగల్ ప‌ర్య‌ట‌న‌లోనే సాంబ‌య్య క‌మ‌లం కండువా క‌ప్పుకుంటార‌ని స‌మాచారం.
