త్వరలో బీజేపీలో చేరుతా : సర్వే

దిశ, వెబ్‌డెస్క్: గ్రేటర్ ఎన్నికలు సమీపిస్తున్న నేపథ్యంలో తెలంగాణలో కాంగ్రెస్‌ పార్టీకి భారీ షాక్ తగిలింది. ఆ పార్టీ సీనియర్ నేత, కేంద్ర మాజీ మంత్రి సర్వే సత్యనారాయణ త్వరలో బీజేపీలో చేరుతున్నట్లు ప్రకటించారు. బీజేపీలో చేరాలని పార్టీ రాష్ట్ర అధ్యక్షుడు బండి సంజయ్, మాజీ ఎంపీ వివేక్ కోరడంతో ఈ నిర్ణయం తీసుకున్నట్టు ఆయన వెల్లడించారు. ప్రొటోకాల్ ప్రకారం బీజేపీలో చేరుతున్నట్లు తెలిపారు. అంతేగాకుండా తనతో పాటు చాలా మందిని బీజేపీలో చేర్పిస్తానని సర్వే సత్యనారాయణ స్పష్టం చేశారు. ఇప్పటికే దుబ్బాక ఉప ఎన్నికల్లో ఘోరంగా విఫలం అయిన కాంగ్రెస్ పార్టీకి, గ్రేటర్ ఎన్నికల ముందు ఇది పెద్ద ఎదురు దెబ్బగానే భావించొచ్చు. మరో నేత కొండా విశ్వేశ్వరరెడ్డి కూడా కాంగ్రెస్‌ను వీడనున్నట్లు సమాచారం. అయితే శుక్రవారం హైదరాబాద్ మహేంద్రహిల్స్‌లోని సర్వే సత్యనారాయణ ఇంట్లో బీజేపీ రాష్ట్ర అధ్యక్షుడు బండి సంజయ్, మాజీ ఎంపీ వివేక్ కలిసిన విషయం తెలిసిందే.