ట్రాక్టర్ ప్రమాదంలో రైతు దుర్మరణం

దిశ, భూత్పూర్ : వ్యవసాయ పనులు చేస్తుండగా ట్రాక్టర్ ప్రమాదంలో రైతు మృతి చెందిన సంఘటన మంగళవారం పోతులమడుగు గ్రామంలో జరిగింది. గ్రామానికి చెందిన కరుణాకర్ రెడ్డి (50) తన వ్యవసాయ పొలంలో ట్రాక్టర్ తో వరి సాగు కోసం కరిగెట చేస్తుండగా సాంకేతిక సమస్య పరిష్కారంతో ట్రాక్టర్ను ఆపి క్రింద మరమ్మత్తు చేస్తూ ఉండగా ట్రాక్టర్ స్టార్ట్ అయ్యి ముందుకు దూసుకెళ్లింది. ఈ సంఘటనలో కరుణాకర్ రెడ్డి కి తీవ్ర గాయాలు అయ్యి అక్కడికక్కడే మృతి చెందాడు.

కుటుంబ సభ్యులు, పోలీసులు సంఘటన స్థలానికి చేరుకొని పోస్టుమార్టం నిమిత్తం మృతదేహాన్ని జిల్లా ఆసుపత్రికి తరలించారు. రైతుగా వ్యవసాయ రంగంలో పనిచేసుకుంటూనే.. రాజకీయాలలోనూ కరుణాకర్ రెడ్డి బిజీగా ఉండేవాడు. కాగా కరుణాకర్ రెడ్డి కి భార్య,ఇద్దరు కుమార్తెలు, ఒక కుమారుడు ఉన్నారు. విషయం తెలిసిన వెంటనే వివిధ రాజకీయ పార్టీల నాయకులు, కార్యకర్తలు, కుటుంబ సభ్యులు పెద్ద ఎత్తున జిల్లా ఆసుపత్రికి తరలి వెళ్లారు. ఈ మేరకు భూత్పూర్ పోలీసులు కేసు నమోదు చేసుకుని దర్యాప్తు చేస్తున్నారు.