రైతు వేదిక పనులను వెంటనే పూర్తి చేయాలి

దిశ ప్రతినిధి, ఆదిలాబాద్ : రైతు వేదికల నిర్మాణ పనులను త్వరగతిన పూర్తి చేయాలని అధికారులను జిల్లా కలెక్టర్ ముషర్రఫ్ ఫారూఖీ ఆదేశించారు. రైతు వేదికల నిర్మాణ పనుల పురోగతిపై కలెక్టరేట్‌లో అధికారులతో ఆయన సమావేశాన్ని సోమవారం నిర్వహించారు. ఈ సందర్బంగా నిర్మాణ పనుల పురోగతిని పవర్ పాయింట్ ప్రజెంటేషన్ ద్వారా పరిశీలించి అధికారులకు పలు సూచనలు చేశారు. అనంతరం జిల్లా కలెక్టర్ మాట్లాడుతూ… పల్లె ప్రగతిలో భాగంగా చేపట్టిన రైతు వేదికల నిర్మాణ పనులను త్వరగతిన పూర్తి చేయాలని ఆదేశించారు. జిల్లాకు మంజూరైన 79 రైతు వేదికల్లో ఇప్పటివరకు చిట్యాల, హంపోలి, తాండ్ర గ్రామల్లో పూర్తి చేశారని తెలిపారు. మిగతా చోట్ల వివిధ దశల్లో నిర్మాణ పనులు పురోగతిలో ఉన్నాయని తెలిపారు. రైతు వేదిక ప్రాంగణంలో పచ్చదనం పెంపొందేలా విరివిగా మొక్కలు నాటాలన్నారు. ప్రతి రోజూ పనులు జరిగేలా సంబంధిత శాఖల అధికారులు పర్యవేక్షించాలని సూచించారు. నిర్మాణ పనుల్లో నాణ్యత లోపిస్తే సహించేది లేదన్నారు. విధుల్లో అధికారులు నిర్లక్ష్యం వహిస్తే కఠిన చర్యలు తీసుకుంటామని ఆయన హెచ్చరించారు.