Axis Bank: ఎఫ్‌డీలపై వడ్డీ రేట్లు పెంచిన యాక్సిస్ బ్యాంక్
దిశ, బిజినెస్ బ్యూరో: ప్రముఖ ప్రైవేట్ రంగ యాక్సిస్ బ్యాంక్ కొన్ని కాలపరిమితులపై తన ఫిక్స్‌డ్ డిపాజిట్(ఎఫ్‌డీ)లపై వడ్డీ రేట్లను పెంచుతూ నిర్ణయం తీసుకుంది. అధికారిక వెబ్‌సైట్ వివరాల ప్రకారం.. రూ. 3 కోట్ల వరకు డిపాజిట్లకు కొత్త వడ్డీ రేట్లు వర్తించనుండగా, సవరించిన ఎఫ్‌డీ రేట్లు సెప్టెంబర్ 10 నుంచి అమల్లోకి రానున్నాయి. 7 రోజుల నుంచి 10 ఏళ్ల మధ్య కాలవ్యవధులపై సాధారణ ఖాతాదారులకు 3-7.25 శాతం మధ్య వడ్డీని బ్యాంకు అందిస్తుంది. ఇదే కాలపరిమితిలో సీనియర్ సిటిజన్‌లకు 3.5 శాతం నుంచి 7.75 శాతం మధ్య వడ్డీని ఆఫర్ చేస్తోంది. ముఖ్యంగా 15 నెలల నుంచి 2 సంవత్సరాల మధ్య ఎఫ్‌డీలకు అత్యధికంగా 7.25 శాతం వడ్డీని బ్యాంకు అమలు చేస్తోంది. మిగిలిన వాటిలో 61 రోజుల నుంచి 3 నెలలకు 4.50 శాతం, 6 నెలలకు 4.75 శాతం, 9 నెలలకు 5.75 శాతం, ఏడాది కాలవ్యవధిపై 6 శాతం, 2-5 ఏళ్లకు 7.10 శాతం,5-10 ఏళ్లకు 7 శాతం వడ్డీని బ్యాంకు ఆఫర్ చేస్తోంది.
