పట్టభద్రుల ఎమ్మెల్సీ కాంగ్రెస్ అభ్యర్థులు వీళ్లే..
దిశ, తెలంగాణ బ్యూరో : రాష్ట్రంలో త్వరలో జరిగే పట్టభద్రుల ఎమ్మెల్సీ స్థానాలకు పార్టీలు సిద్ధమవుతున్నాయి. ఇప్పటికే అధికార పార్టీ ఒక స్థానానికి అభ్యర్థిని ప్రకటించింది. తాజాగా కాంగ్రెస్ పార్టీ కూడా రెండు స్థానాలకు అభ్యర్థులను ఖరారు చేసి ప్రకటన విడుదల చేసింది. నల్లగొండ-వరంగల్-ఖమ్మం అభ్యర్థిగా మాజీ ఎమ్మెల్సీ రాములు నాయక్, హైదరాబాద్-రంగారెడ్డి-మహబూబ్‌నగర్ అభ్యర్థిగా మాజీ మంత్రి చిన్నారెడ్డిని ఎంపిక చేసినట్లు ఏఐసీసీ తరుపున ముఖుల్ వాస్నిక్ ప్రకటించారు.
ఈ రెండు ఎమ్మెల్సీ స్థానాలపై కాంగ్రెస్ పార్టీ గెలుపు ఆశలు పెట్టుకుంది. ఇక్కడ పోటీ చేసేందుకు పార్టీ నుంచి పలువురు పోటీ పడ్డారు. దీంతో ఏఐసీసీ రాష్ట్ర వ్యవహారాల ఇంఛార్జ్ మాణిక్కం ఠాగూర్ అభిప్రాయసేకరణ చేశారు. అనంతరం నివేదికను ఏఐసీసీకి పంపించారు. రాష్ట్ర పార్టీ నేతల అభిప్రాయం మేరకు రాములు నాయక్, చిన్నారెడ్డిలను ఎంపిక చేశారు.
అయితే ఇప్పటికే కరీంనగర్ స్థానం నుంచి జీవన్రెడ్డి గెలుపొందడంతో కాంగ్రెస్ ఇక్కడ కూడా గెలుస్తామనే ధీమాతో ఉంది. అయితే అంతకు ముందు దుబ్బాక ఉప ఎన్నికలు, గ్రేటర్ హైదరాబాద్ ఎన్నికల్లో ఘోర పరాజయాన్ని మూటగట్టుకుంది. కానీ ఈ స్థానాల్లో మాత్రం అవకాశాలు ఉంటాయని భావిస్తున్నారు.
