విద్యార్థినిని గర్భవతిని చేసిన లెక్చరర్...అబార్షన్ చేసుకోవాలంటూ దారుణం
దిశ, డైనమిక్ బ్యూరో : గురువును దేవుడితో కొలిచే సంప్రదాయం మనది. అందుకే గురువును గురు బ్రహ్మ అని కొలుస్తారు. విద్యార్థికి విద్యాబుద్ధులు నేర్పించి వారి జీవితానికి ఒక చక్కటి మార్గాన్ని చూపించే దేవుడిగా ఉపాధ్యాయుడిని భావిస్తారు. అంతటి పవిత్రమైన ఉపాధ్యాయ వృత్తిలో ఉంటూ ఓ వ్యక్తి తన వక్రబుద్ధిని బయటపెట్టాడు. ఓ ప్రైవేట్ కాలేజీలో లెక్చరర్‌గా పనిచేస్తున్న సదరు వ్యక్తి దారి తప్పాడు. కంటికి రెప్పలా కాపాడాల్సిన విద్యార్థినిపై కన్నేశాడు. కామాంధుడిలా మారి ఆ బాలిక జీవితాన్ని సర్వనాశనం చేశాడు. గర్భవతిని చేశాడు. అబార్షన్ చేయించుకోవాలని చావబాదాడు. దీంతో సదరు విద్యార్థిని ఆస్పత్రిలో చావుబతుకుల మధ్య కొట్టుమిట్టాడుతోంది. ఈ దారుణ ఘటన ప్రకాశం జిల్లా మార్కాపురంలో జరిగింది.
ఫోటోలతో బ్లాక్ మెయిల్ చేసి
మార్కాపురం పట్టణానికి చెందిన ఓ విద్యార్థిని స్థానికంగా ఉన్న ప్రైవేటు కాలేజీలో ఇంటర్మీడియట్‌లో చేరింది. అయితే అదే కాలేజీలో గొవింద్ నాయక్ అనే వ్యక్తి లెక్చరర్‌గా పని చేస్తున్నాడు. పెళ్లై ఓ కొడుకు సంతానం కూడా. చక్కటి భార్య..మంచి ఉద్యోగం ఉన్నప్పటికీ అతడి వక్రబుద్ధి మాత్రం వదల్లేదు. పాఠాలు చెప్పమని వచ్చిన విద్యార్థినిపై కన్నేశాడు. ఓ రోజు కాలేజీ నుంచి ఒంటరిగా వెళ్తున్న బాలికను ఇంటి దగ్గర దింపుతానని బైక్‌పై ఎక్కించుకుని తీసుకెళ్లాడు. పట్టణ శివారుల్లోకి తీసుకెళ్లి అక్కడ ఆమెపై దారుణానికి పాల్పడటంతో కొన్ని ఫోటోలను సైతం చిత్రీకరించాడు. అనంతరం ఆ అశ్లీల ఫోటోలను చూపిస్తూ పలుమార్లు లైంగిక దాడికి పాల్పడ్డాడు. అతడి వేధింపులు భరించలేక ఆ బాలిక సెకండ్ ఇయర్ వేరే కాలేజీలో చేరింది. అయినప్పటికీ అతడి బుద్ధి ఏమాత్రం మారలేదు. కాలేజ్ మారడంతో గోవింద్ నాయక్ వికృత చేష్టలతో మరింత రెచ్చిపోయాడు. ఆమె న్యూడ్ ఫోటోలను వేరే వాళ్లకు చూపిస్తానంటూ బెదిరిస్తూ లొంగదీసుకున్నాడు. దీంతో ఆ విద్యార్థిని గర్భం దాల్చింది. ఈ విషయం తెలుసుకున్న గోవింద్ నాయక్ అబార్షన్ చేయించుకోవాలంటూ ఆమెపై ఒత్తిడి పెంచాడు. అబార్షన్ చేయించుకునేందుకు బాలిక భయపడింది. చేయించుకోనని చెప్పేసింది.
అబార్షన్ కోసం కడుపుపై దాడి
అప్పటికే పెళ్లై ఓ కొడుకు కూడా ఉన్న గోవింద నాయక్ బాలిక గర్భం దాల్చడంతో ఆందోళన చెందాడు. అంతే బాలికను అబార్షన్ చేయించాలని ప్లాన్ వేశాడు. ఎన్నిసార్లు బతిమిలాడినా వినకకపోవడంతో దారుణానికి పాల్పడ్డాడు. కడుపుపై తీవ్రంగా కొట్టాడు. దీంతో కామాంధుడి చేతిలో గాయాలపాలైన ఆ బాలికను కుటుంబ సభ్యులు ఆస్పత్రిలో చేర్పించారు. బాధితురాలిని పరిశీలించిన వైద్యులు కడుపుపై దెబ్బలు తగలంతో విద్యార్థిని ప్రాణాలకే ప్రమాదం ఏర్పడే పరిస్థితి తలెత్తిందని తెలిపారు. వెంటనే అబార్షన్ చేయించారు. అనంతరం వైద్యులు, కుటుంబ సభ్యుల సహకారంతో బాధితురాలు పోలీసులకు ఫిర్యాదు చేసింది. ఆ బాలిక ఫిర్యాదు మేరకు ప్రైవేట్ లెక్చరర్ గోవింద్ నాయక్ పై అత్యాచారం, పోక్సోతోపాటు పలు సెక్షన్ల కింద పోలీసులు కేసు నమోదు చేసి దర్యాప్తు చేపట్టారు. వైద్య పరీక్షలు నిమిత్తం విద్యార్థినిని ఆసుపత్రికి తరలించినట్లుగా మార్కాపురం ఎస్ఐ కోటేశ్వరరావు మీడియాకు వెల్లడించారు.
