Nellore: మూగ మహిళపై అత్యాచారయత్నం.. ముగ్గురి అరెస్ట్
దిశ, డైనమిక్ బ్యూరో: నెల్లూరు జిల్లా కందుకూరు మాచవరం రోడ్డులోని పెట్రోల్‌ బంక్‌ సమీపంలో కామాంధులు రెచ్చిపోయారు. పట్టపగలు నడుచుకుంటూ వెళ్తున్న ఓ దివ్యాంగ మహిళపై ముగ్గురు వ్యక్తులు అత్యాచారయత్నానికి పాల్పడ్డారు. అయితే బాధిత మహిళ గట్టిగా కేకలు వేస్తూ వారి చెర నుంచి తప్పించుకున్నారు. రక్షించాలంటూ దగ్గరలోని పెట్రోల్‌ బంక్‌లోకి వెళ్లారు. బంక్‌లో పని చేస్తున్న సిబ్బంది మహిళను నిందితుల చెర నుంచి రక్షించి పోలీసులకు సమాచారం అందించారు.
దీంతో బుధవారం మధ్యాహ్నం డీఎస్పీ రామచంద్ర, సీఐ వెంకటరావు ఘటనా స్థలాన్ని పరిశీలించి స్థానికులను వివరాలు అడిగి తెలుసుకున్నారు. నిందితులపై అత్యచారయత్నం కేసుతో పాటు అట్రాసిటీ కేసు నమోదు చేసి దర్యాప్తు చేస్తున్నట్లు డీఎస్పీ రామచంద్ర తెలిపారు. బాధిత మహిళ చెప్పిన వివరాల ప్రకారం పోలీసులు ముగ్గురు నిందితులను అదుపులోకి తీసుకున్నారు. నిందితుల్లో ఒకరు ఆటో డ్రైవర్‌ కాగా.. మరో ఇద్దరు కందుకూరు టౌన్‌లో పని చేస్తున్నట్లు పోలీసులు వెల్లడించారు. నిందితులను అరెస్ట్ చేసి స్టేషన్‌కు తరలించినట్లు తెలిపారు. అలాగే బాధిత మహిళను సురక్షితంగా పోలీస్ స్టేషన్‌కు తరలించినట్లు డీఎస్పీ రామచంద్ర తెలియజేశారు.
