CM Chandrababu: శభాష్ సుభాష్.. నీ సత్తా ఏంటో చూపించావ్: సీఎం చంద్రబాబు ప్రశంసలు
దిశ, కోనసీమ ప్రతినిధి: రావయ్యా సుభాష్.. స్వల్ప కాలంలో ఓటరు నమోదు శాతాన్ని 90 శాతాన్ని దాటించి యువ నాయకుల సత్తా చూపించావు.. అలా కసిగా పని చేయాలి.. అంటూ మంత్రి సుభాష్‌ను సీఎం చంద్రబాబు అభినందించారు. ఇదే దూకుడుతో పని చేస్తే నీకు మంచి భవిష్యత్తు ఉంటుందని కితాబు ఇచ్చారు. మంత్రివర్గంలో యువతకు ప్రాధాన్యత ఇచ్చింది కూడా అందుకే అంటూ ప్రశంసించారు. రాజధాని అమరావతిలో బుధవారం జరిగిన మంత్రివర్గ సమావేశం అనంతరం చంద్రబాబును మంత్రి సుభాష్ మర్యాదపూర్వకంగా కలిశారు. రామచంద్రపురం నియోజవర్గంలో జరుగుతున్న అభివృద్ధి సంక్షేమ కార్యక్రమాలను సీఎంకు వివరించారు.
కూటమి అభ్యర్థి పేరాబత్తుల రాజశేఖర్‌ను అత్యధిక మెజారిటీతో గెలిపించుకుంటామని హామీ ఇచ్చారు. దీనిపై సీఎం చంద్రబాబు స్పందిస్తూ రామచంద్రపురం నియోజవర్గంలో ఎమ్మెల్సీ ఓటరు నమోదు ప్రక్రియను వేగవంతం చేసి, స్వల్ప కాలంలో ఊహించని రీతిలో ఓటర్ నమోదు 90 శాతంపైగా పెంచేందుకు కృషి చేసిన మంత్రి సుభాష్‌ను అభినందించారు. యువకులైన మీలో ఉత్సాహం నింపేందుకు బాధ్యత గల సీఎంగా నా ప్రోత్సాహం, సహకారం, అవసరమైతే అప్పుడప్పుడు గద్దింపులు కూడా ఉంటాయని చమత్కరించారు. ప్రభుత్వం అమలు చేసే అభివృద్ధి సంక్షేమం ప్రజలకు తెలిసేలా ప్రజా ప్రతినిధులు అంతా సమష్టిగా కృషి చేయాలని సీఎం సూచించారు.
