Ap News: వైసీపీ కబ్జాలను బయట్టపెట్టిన చంద్రబాబు.. వామ్మో ఇంత పెద్ద లిస్టా..?

దిశ, అమరావతి: రాష్ట్రంలోని అన్ని రకాల సహజ వనరులను గత వైసీపీ ప్రభుత్వం సర్వం దోచేసిందని ముఖ్యమంత్రి నారా చంద్రబాబు నాయుడు అన్నారు. ప్రభుత్వ ఉగ్రవాద చర్యలతో ఇష్టానుసారంగా భూములు, గనులు, ఎర్రచందనం, అటవీ సంపదనంతా దోచేశారని మండిపడ్డారు. అధికారాన్ని అడ్డుపెట్టుకుని దోపిడీకి పాల్పడ్డ ఏ ఒక్కరినీ వదిలిపెట్టబోమని హెచ్చరించారు. వెలగపూడి సచివాలయంలో సోమవారం సహజ వనరుల దోపిడీపై సీఎం శ్వేతపత్రం విడుదల చేశారు. అనంతరం చంద్రబాబు నాయుడు మాట్లాడుతూ....‘‘గత ప్రభుత్వం పంచ భూతాలను సైతం మింగేసింది. రాష్ట్రంలో పెద్ద ఎత్తున భూ కుంభకోణ జరిగింది. ఖనిజ సంపద, అడవులను ఇష్టానుసారంగా ధ్వంసం చేశారు. మాకు అందిన రికార్డుల ప్రకారం కంటే ఎక్కువగానే దోపిడీ జరిగింది. ఆర్థిక ఉగ్రవాదులందారూ వినూత్నంగా దోపిడీ పంథాను ఎన్నుకున్నారు. విశాఖ, ఒంగోలు, చిత్తూరు, తిరుపతిలో జరిగిన సహజవనరుల దోపిడీ ఒక కేస్ స్టడీ. ఇళ్ల స్థలాల పేరుతో ఇష్టానుసారంగా అధికార దుర్వినియోగానికి పాల్పడ్డారు. ముందుగానే భూములు గుర్తించి వాటిని తక్కువ ధరకు కొనుగోలు చేసి వాటికి రెండింతలు ధర నిర్ణయించుకుని ప్రభుత్వానికి విక్రయించారు. 26 జిల్లాల్లో వైసీపీ కార్యాలయాలకు స్థలాలు కేటాయించుకుని ప్యాలెస్ లు కట్టుకున్నారు. ఐదేళ్ల పాటు ప్రజాస్వామ్యానికి గంతలు కట్టారు. అసైన్డ్ భూములను ఇష్టా రీతిని అనర్హులకు కేటాయించుకున్నారు. భూ సర్వే పేరుతో భూముల సరిహద్దులను మార్చారు. వైసీపీ భూ దోపిడీకి ల్యాండ్ టైటిలింగ్ యాక్ట్ చట్టం పరాకాస్ట...భూమ్మీద హక్కులు లేకుండా చేయడానికి ఈ ల్యాండ్ టైటిలింగ్ యాక్ట్ తెచ్చారు.

విశాఖపట్నంలో కబ్జాలు...భూ దందాలు

విశాఖలో రామానాయుడు స్టూడియోకు ఇచ్చిన భూమిని అక్రమంగా రెసిడెన్షియల్ క్లాసిఫికేషన్ చేసి వాటా కొట్టేయాలని చూశారు..ప్రస్తుతం ఆ వివాదం సుప్రీం కోర్టులో ఉంది. విశాఖలో రామానాయుడు స్టూడియోకు నేనే గతంలో భూమలు ఇచ్చాను. హైదరాబాద్ తర్వాత విశాఖ షూటింగ్ లకు అనుకూలంగా ఉంటుందని కేటాయించాం. 12.51 ఎకరాల హయగ్రీవ భూముల్ని ఓల్డేజ్ హోం కు ఇస్తే దాన్ని విశాఖ మాజీ ఎంపీ ఎంవీవీ సత్యనారాయణ కొట్టేయాలని చూశారు. శారదాపీటానికి ఎకరాల రూ.లక్షకే 15 ఎకరాలు అందించారు. షాఫీ హియరింగ్ క్యారీకి ఒక్కో ఎకరా రూ.15 కోట్లు విలువ చేసే భూమిని ఉచితంగా ఇచ్చారు. ప్రభుత్వ భూములను సొంత సొమ్ములా దానంగా ఇచ్చారు. దసపల్లా భూముల్లో కూడా అక్రమంగా అపార్ట్ మెంట్లు నిర్మించారు. మాజీ ఎంపీ ఎంవీవీ ఎన్.కే హౌసింగ్ కంపెనీకి 10.57 ఎకరాలు కేటాయించి 0.96 శాతం వాటా లబ్ధిదారులకు ఇచ్చారు. ఎంవీవీ బిల్డింగ్స్ అనుమతి ఇచ్చి రూ.65 కోట్ల విలువ చేసే టీడీఆర్ బాండ్లను జారీ చేసి కుంభకోణానికి పాల్పడ్డారు.

ఒంగోలు, తిరుపతిలో కోట్లు విలువ చేసే భూములు అన్యాక్రాంతం

ఒంగోలులో రూ.101 కోట్లు విలువ చేసే ఆస్తులను కొట్టేశారు. ప్రభుత్వ, ఖాళీ భూములకు తప్పుడు పత్రాలు సృష్టించి కాజేశారు. ఈ దందాలో 77 మంది నిందితులు తేలారు. భూముల్లో వైసీపీ జండా పెట్టేసి కాజేశారు. తిరుపతిలో మరో విచిత్రమైన పరిస్థితి ఉంది. ఆఖరికి మఠం భూములను కూడా దోచేశారు. తిరుచానారులో 4.5 ఎకరాలు, మంగళంలో 27.14 ఎకరాలు, దామినీడులో 3.32 ఎకరాలు, చిగురువాడలో 1.33 ఎకరాలు, సూరప్పకసంలో 12.69 ఎకరాలు, కోటమంగళంలో 15.28 ఎకరాలు, దుర్గసముద్రంలో 7.98 ఎకరాల చొప్పున ఇలా...కాలువ, ప్రభుత్వ భూములు కొట్టేశారు. కాలువ పోరంబోకు, కుంట పోరంబోకు, ల్యాండ్ సీలింగ్ భూములను కూడా వదలకుండా దోచేశారు. చిత్తూరు జిల్లాలో 982 ఎకరాలు కొట్టేశారు. 22 ఏ జాబితా నుండి తొలగించి రిజిస్ట్రేషన్ చేసుకున్నారు.

ఇళ్ల పట్టాల పేరుతో 10 వేల ఎకరాల అసైన్డ్ భూములకు ఎసరు

ఇళ్ల పట్టాల పేరుతో రాష్ట్ర వ్యాప్తంగా ఎస్సీ, ఎస్టీ, బీసీలకు చెందిన 10 వేల ఎకరాలు బలవంతంగా లాక్కున్నారు. పేదలకు పెత్తందారులు అంటూ చెప్పిన పెద్ద మనుషుల పేదల భూములు కొట్టి వారి పొట్ట గొట్టారు. అసైన్డ్ భూమి ఒకసారి కేటాయించాక వారి నుండి తిరిగి తీసుకోవాలంటే పరిహారం ఇవ్వాల్సి ఉంది. కానీ బలవంతంగా లాక్కున్నారు. ఆవ భూముల్లో కూడా దోపిడీ జరిగింది. అవి ఇంటి స్థలాలకు పనికిరావని తెలిసినా కేటాయించారు. లెవలింగ్ పేరుతోనూ దోచుకున్నారు. ఇళ్ల స్థలాలకు గుడివాడలో 256 ఎకరాలను రూ.185 కోట్లకు కొనుగోలు చేశారు. కేసరపల్లిలో 73 ఎకరాలను రూ.51 కోట్లకు కొనుగోలు చేశారు. ఉన్న మార్కెట్ రేటు కంటే 5 రెట్లు ఎక్కువ ఇచ్చారు. వర్షాల సమయంలో సీ కోస్ట్ లో మ్యాంగ్రోవ్ ఉపయోగపడుతుంది...వాటిని కూడా ధ్వంసం చేయాలని చూశారు. వైసీపీ కార్యాలయాలకు భూములు కేటాయించడం కోసం జీవో నెంబర్ 340 తీసుకొచ్చారు. దీని ద్వారా 2 ఎకరాల చొప్పున 33 ఏళ్లకు లీజుకు ఇచ్చారు. రాష్ట్రం మొత్తంగా రూ.300 కోట్ల విలువ చేసే 40.78 ఎకరాల భూమిని వైసీపీ పార్టీ కార్యాలయాలకు అప్పనంగా కేటాయించుకున్నారు. కనీసం అనుమతులు లేకుండా నిర్మాణాలు చేపట్టారు. తాడేపల్లిలో ఇరిగేషన్ భూమిలో అనుమతి లేకుండా నిర్మించారు. అక్రమంగా పార్టీ కార్యాలయాల నిర్మాణం చేపడుతున్నారంటే బెదిరిస్తారు...రౌడీయిజం చేస్తారు.

అనర్హులకు అప్పనంగా 8,086 ఎకరాలు

రాష్ట్రంలో పేదలకు చెందాల్సిన 8,086 ఎకరాల భూమిని అనర్హులకు అప్పనంగా రాయించేసుకున్నారు. కడప జిల్లాలో 3,357 మందికి 5796 ఎకరాలు, కర్నూలు జిల్లాలో 856 మందికి 1,145 ఎకరాలు, అనంతపురం జిల్లాలో 3,471 మందికి 5,554 ఎకరాలు, అన్నమయ్య జిల్లాలో 84 మందికి 103.15 ఎకరాలు, నంద్యాల జిల్లాలో 318 మందికి 483 ఎకరాలు..ఇలా మొత్తంగా 8,086 ఎకరాలను కేటాయించుకున్నారు. దీని విలువ రూ.13 వందల కోట్లు ఉంటుంది. అసైన్డ్ ల్యాండ్ అంటేనే పేదలకు రక్షణగా ఉంటుంది...ఒకరు రాసుకున్నా...రాయించుకున్నా చెల్లదు. కానీ పెద్ద ఎత్తున అసైన్డ్ భూములు తక్కువ ధరకు కొనుగోలు చేశారు. అధికారులను బెదిరించి ఫ్రీ హోల్డ్ చేశారు. ఇలాంటి భూములను పట్టాలు చేసుకున్న వారు జైలుకు వెళతారు. ఉమ్మడి రాష్ట్రంలో ఇడుపులపాయలో జరిగిన 600 ఎకరాల భూ దోపిడీపై నాడు సర్వేలు తీయించాం...దాన్ని అసెంబ్లీలో పెట్టాక నాకు తెలియదు..మా నాన్న సమయంలో తెలియక జరిగింది..ప్రభుత్వానికి అప్పగిస్తున్నాం అని నాడు అసెంబ్లీలో చెప్పారు.

భూ రీసర్వే పేరుతో పాసుపుస్తకాలు, సరిహద్దు రాళ్లపై బొమ్మలకు రూ.653 కోట్లు తగలేశారు

శాశ్వత భూ రక్ష చట్టం అని పెట్టి దానిపైన ప్రభుత్వ రాజముద్ర లేకుండా జగన్ ఫోటో వేసుకున్నారు. ఇదంతా మనిషి అహంభావం...ఏం చేసినా చెల్లుబాటు అవుతుందని అనుకున్నారు. రూ.13 కోట్లు ఖర్చు పెట్టి పట్టాదారు పుస్తకాలపై ఫోటోలు వేసుకున్నారు. ప్రభుత్వ అధికారాన్ని దుర్వినియోగం చేశారు. వైఎస్ఆర్ భూరక్ష పేరుతో సర్వే చేసి రాళ్లపైన బొమ్మలు వేసుకున్నాడు. ఎవడన్నా చనిపోయినా తర్వాత బొమ్ములు వేసుకుంటారు..బతికుండానే బొమ్మలు వేసుకున్నాడని చాలా మంది అన్నారు. ఆ గ్రానైట్ రాళ్ల కొనుగోలుకు రూ.640 కోట్లు ఖర్చు పెట్టారు. ఇది పిచ్చా...మదమా...అహంకారమా? ప్రజాధనానికి రక్షణగా ఉండాలి కానీ...తగలబెట్టకూడదు.

వైసీపీ నేతలు లాక్కున్న భూములు బాధితులకు అప్పగిస్తాం

అధికారంలో దిగిపోయే నాటికి పెద్ద స్కెచ్ వేశారు. ల్యాండ్ టైటిలింగ్ యాక్ట్ తెచ్చి నీతి ఆయోగ్ ఆదేశాలతో తెచ్చామని చెప్పారు. దేశంలో ఎక్కడా ఇలాంటి చట్టం లేదు. ప్రైవేట్ వ్యక్తులను కూడా టైటిల్ రిజిస్ట్రేషణ్ ఆఫీసర్ గా నియమించుకోవచ్చని చట్టంలో పెట్టారు. అందుకే ఈ చట్టాన్ని రద్దు చేశాం. ఇప్పటి వరకు లేవనెత్తిన వాటి ప్రకారం విశాఖలో రూ.4,469 కోట్లు, ప్రకాశంలో రూ.101 కోట్లు, తిరుపతిలో రూ.270 కోట్లు, ఇళ్ల స్థలాల్లో రూ.2,850 కోట్లు, వైసీపీ కార్యాలయానికి ఇచ్చిన వాటిల్లో రూ.300 కోట్లు, అనర్హులకు అప్పగించిన వాటిలో రూ.13 వందల కోట్లు, అసైన్డ్ ల్యాండ్స్ ఫ్రెష్ హోల్డ్ తో రూ.14,831 కోట్లు, ఫ్రీహోల్డ్ చేసి అక్రమంగా పొందినవి రూ.6,189 కోట్లు, అక్రమంగా షట్రగళ్లా పట్టా భూములుగా మార్చిన దాంట్లో రూ.1002 కోట్లు, ఇనామ్ భూములను సర్వీస్ భూములుగా మార్చి రూ.4,165 కోట్లు కోట్లు విలువ చేస్తాయి. వీటి మొత్తం విలువ రూ.35,576 కోట్లుగా ఉంటుంది. బలవంతంగా లాక్కున్నా, ల్యాండ్ టైటిలింగ్ ద్వారా తీసుకున్నా, పేర్లు మార్చి తీసుకున్నా ఎవరైనా వచ్చి ఫిర్యాదు చేస్తే బాధితులకు తిరిగి ఇచ్చేస్తాం. తప్పు చేసిన వారిని కఠినంగా శిక్షిస్తాం...మళ్లీ చేయాలంటే భయపడేలా చేస్తాం. గుంటూరులో రంగనాయకమ్మ ఆస్తులను కొట్టేశారు. అవసరమైతే పది రూపాయలు ఖర్చు పెట్టైనా సరే గత ప్రభుత్వంలో వైసీపీ నేతలు లాక్కున్న భూములను తిరిగి బాధితులకు అప్పగిస్తాం.

గుజరాత్ తరహాలో రాష్ట్రంలో ల్యాండ్ గ్రాబింగ్ యాక్ట్

ఏపీ ల్యాండ్ గ్రాబింగ్ యాక్ట్ చట్టం తీసుకొస్తాం...ఇప్పటికే ఇది 2020లో గుజరాత్ లో ఉంది. ఈ యాక్ట్ ప్రకారం ఎవరైనా భూమిని కబ్జా చేస్తే ఆ భూమి వారిదని వారే నిరూపించుకోవాలి. రాష్ట్రంలోని భూగర్భ ఖనిజ సంపదనంతా దోచేశారు. ఇసుక అక్రమాల్లో రూ.7 వేల కోట్లు దోచేశారు. సీనరేజ్ లో రూ.వెయ్యి కోట్లు దోచేశారు. మైనింగ్ క్వారీ లీజు దారులను బెదిరించి, ఫైన్లు వేసి లాక్కున్నారు. బెదిరింపులకు భయపడకపోతే ఇష్టానుసారంగా ఫైన్లువేశారు.. దీంతో భరించలేక క్వారీలను వదిలిపెట్టి పోయారు. అటవీ భూముల్లో కూడా మైనింగ్ కు పాల్పడ్డారు. సుమారు రాష్ట్రంలో రూ.19 వేల కోట్ల విలువైన సహజ వనరులను దోచేశారు.

ఇసుక దోపిడీకి అదుపే లేదు

ఐదేళ్ల పాటు ఇసుక తవ్వకాల్లో డాక్యుమెంట్లు లేకుండా చేశారు. కీ రెగ్యులేషన్ ను అతిక్రమించారు. మినరల్ రెవెన్యూలో రూ.9,750 కోట్లు ప్రభుత్వానికి నష్టం వచ్చింది. 2014-19మధ్య ఉచితంగా ఇసుక అందించాం. నిర్మాణ రంగం బాగా నడిచింది. కానీ వైసీపీ ప్రభుత్వం వచ్చాక నూతన ఇసుక పాలసీ వల్ల ప్రియం చేసింది 130 మంది కార్మికులు పనుల్లేక చనిపోయారు. జేపీ వెంచర్స్ ను తెచ్చారు. ఇష్టానుసారంగా వైసీపీ వాళ్లు కూడా ఎక్కడికక్కడ తవ్వేశారు. జీఎస్టీ చెల్లించలేదు. బయటి వ్యక్తులను తెచ్చి చెప్పి ఎన్ని అవకతవకలు చేయాలో అన్నింటినీ చేశారు. ఇసుక తవ్వకాల కోసం నదుల్లో రోడ్లు వేసి ర్యాంపులు కట్టారు. తవ్వకాలు ఆపాలని ఎన్జీటీ చెప్పినా వినలేదు. దండా నాగేంద్ర అనే వ్యక్తి ఇసుక తవ్వకాలపై కోర్టుకు వెళ్లినందుకు అట్రాసిటీ కేసు పెట్టారు. నేను కూడా క్షేత్రస్థాయిలో ఎన్నో ఇసుక గుట్టలను పూపించాను. కడపలో రాయల్టీ పెంచడంతో ఆత్మహత్య చేసుకుని ఓ వ్యక్తం చనిపోయారు. ఇసుకలో టీడీపీ హయాంలో మొదట రూ.966 కోట్ల ఆదాయం నుండి రూ.2463 కోట్లకు పెరిగింది. కానీ వైసీపీ రూ.2072 కోట్ల నుండి రూ.3425 కోట్ల వద్దే ఆగిపోయింది. టీడీపీ హయాంలో నిలకడగా పెరుగుతూ వచ్చింది. టీడీపీ హయాంలో గ్రోత్ రేట్ 150 శాతం ఉంటే..వైసీపీ హయాంలో 40 శాతం మాత్రమే ఉంది. సీఏజీర్ 24 శాతం పెరిగితే వైసీపీ హయాంలో 7 శాతం మాత్రమే పెరిగింది. ఇదంతా అవినీతి, దోపిడీ చేయడం వల్లే. అటవీ, మైనింగ్ శాఖలు ఒక వ్యక్తికే ఇచ్చారు. రాష్ట్రంలో గత ఐదేళ్ల పాటు జరిగిన ఇసుక తవ్వకాలపై సుప్రీం కోర్టులో విచారణ జరుగుతోంది. ఐదేళ్లు ఇష్టానుసారంగా దోచేశారు. ఇసుక అక్రమ తవ్వకాలపై తప్పుకుండా చర్యలు తీసుకుంటాం. పాత డాక్యుమెంట్లు పెట్టి ఇసుక తవ్వకాలు జరగలేదని కోర్టుకు సమర్పించారు.

క్వార్ట్జ్, సిలికాశాండ్ లీజు దారులను బెదిరించి అక్రమాలు

నెల్లూరు జిల్లాలో సిలికా శాండ్ దోచేశారు. లీజ్ ఓనర్లను బెదిరించి వైసీపీ నేతలు చెప్పిన రేటుకే...వారికే అమ్మేలా చేసుకున్నారు. శ్రీకాకుళంలో రూ.215 కోట్లు గ్రానైట్ పై ఫైన్లు వేశారు. క్వార్ట్జ్, లేటరైట్ ను దోచేశారు. సొంత సిమెంట్ ఫ్యాక్టరీలకే లేటరైట్ సప్లై చేసుకున్నారు. ప్రకాశం జిల్లా 155 క్వారీలపై దాడులు చేశారు...వారిలో కొంతమంది దారికి రాగా 23 మందిపై రూ.614 కోట్లు ఫైన్లు వేశారు. చిత్తూరు జిల్లాలో రూ.248 కోట్లు ఫైన్లు వేశారు. పెద్దిరెడ్డి వారి మనుషులకు, కావాల్సిన వారికి ఇష్టానుసారంగా లీజుకు అప్పగించారు. కుప్పంలో కూడా గ్రానైట్ దోచేశారు. ప్రభుత్వ ఆస్తులను కాపాడటానికి కూడా అవస్థలు పడ్డాం. ద్రవిడ యూనివర్సిటీలో కూడా అక్రమ మైనింగ్ కు పాల్పడ్డారు. అక్రమ మైనింగ్ కు వ్యతిరేకంగా పోరాడిన మా నేతలపై కేసులు పెట్టారు. ఈ సంపదంతా ప్రజలది...దీన్ని పరిరక్షించుకోవాల్సిన బాధ్యత ప్రజలపైనే ఉంది. మెటల్ క్వారీలు కూడా బలవంతంగా లాక్కున్నారు. ఇకపై ఎవరి క్వారీలు వారే నిర్వహించుకోండి.. మా ప్రభుత్వం అండగా ఉంటుంది.

పోలవరం కుడి కాలువను తవ్వే రూ.800 కోట్ల విలువ చేసే మట్టి తరలింపు

పోలవరం కుడి కాల్వను తవ్వేసి రూ.800కోట్ల విలువ చేసే మట్టిన తరలించారు. వరదలొస్తే కాల్వలు ఎలా తట్టుకోగలుగుతాయి.? అమరావతిలో రోడ్లను తవ్వకుపోయారు. ఎర్రచందనం అక్రమ రవాణా కోసం అడవుల్లో విధుల్లో ఉన్న సిబ్బందిని కూడా తగ్గించేశారు. మా హయాంలో 6 వేల మెట్రిక్ టన్నుల ఎర్రచందనాన్ని విక్రయించాం..కానీ వైసీపీ 836 మెట్రిక్ టన్నుల ఎర్రచందనాన్ని మాత్రమే విక్రయించింది. ఏ విధంగా దోచుకున్నారో చూడాలి. స్మగ్లించ్ చేసిన ఎర్రచందనాన్ని చైనా, ఇతర దేశాలకు పంపించారు. స్మగ్లింగ్ తో వచ్చిన ఆదాయంతో రాజకీయాల్లోకి వచ్చారు. స్మగ్లర్ ను తెచ్చి చిత్తూరు ఎమ్మెల్యేగా పోటీ చేయించారు. వైసీపీ ప్రభుత్వంలో రూ.441 కోట్ల ఆదాయం మాత్రమే ఎర్రచందనాన్ని విక్రయించడం వల్ల వచ్చింది...మా హయాంలో రూ.1623 కోట్ల ఆదాయం వచ్చింది. స్మగ్లింగ్ సమాజానికే చాలా ప్రమాదం. పుంగనూరు, చిత్తూరు, పల్నాడు ప్రాంతాల్లో అడవులను పెద్ద ఎత్తున ధ్వంసం చేశారు. కర్నూలు జిల్లాలో బ్రహ్మంగారు కాలజ్ణానం రాసిన రవ్వల కొండను తవ్వేశారు. విశాఖలో రుషికొండను తవ్వేసి ప్యాలెస్ కట్టారు. ఇది ఎందుకు కట్టారు అంటే పీఎం వచ్చినప్పుడు ఉండటానికి అని కబుర్లు చెప్పారు. 500 కోట్లు ఖర్చు పెట్టి ప్యాలెస్ కట్టారు. దాన్ని ఏం చేయాలో నాకు కూడా అర్థం కావడం లేదు. ప్రజలకు సేవకులుగానే ఉండాలి తప్ప...రాజులుగా ఉండకూడదు. స్వేచ్ఛగా ఎవరి వ్యాపారం వారు చేసుకునే వాతావరణం కల్పిస్తాం. ప్రజాస్వామ్యంలో గత పాలకులు ఉండాల్సిన అవసరం ఉండకూడదు. దోపిడీ జరిగిందని ప్రజలు చెప్తే వారిపై దాడులు చేశారు...వార్తలు రాసిన మీడియాను బెదిరించారు. దొంగలకు తాళాలు ఇచ్చి దోచుకునేలా చేశారు.

వైసీపీ భూ కబ్జాలపై టోల్ ఫ్రీ నంబర్ ఏర్పాటు

భూ కబ్జాలపై టోల్ ఫ్రీ నంబర్ ఏర్పాటు చేస్తాం. మా దృష్టికి తీసుకొచ్చిన ఫిర్యాదులపై విచారణ చేసి బాధితులకు అప్పగిస్తాం. తప్పు చేసిన వారిని ఎట్టి పరిస్థితుల్లోనూ వదిలిపెట్టను. రెవెన్యూ వచ్చే శాఖల్లో బయట నుండి తీసుకొచ్చినవారిని పెట్టుకున్నారు. పేదలకు ఉచితంగా ఇంటి జాగా ఇస్తున్నామని చెప్పి పేదల పేరుతో భూములు కొట్టేశారు. ఆకాశమే హద్దుగా వైసీపీ నేతలు అక్రమాలకు పాల్పడ్డారు. రేషన్ బియ్యంలో కూడా లెక్కలేనన్ని అక్రమాలకు పాల్పడ్డారు. ఒకే కుటుంబంలో ఉన్న వ్యక్తికే పౌరసరఫరాల శాఖ, రైస్ మిల్లర్ల అసోసియేషన్ పదవుల్లో ఉన్నారు. భూముల రీ సర్వే జరిగిన చోట అవకతవకలు జరిగి ఉంటే సరిచేస్తాం. గతంలో హద్దులకు సంబంధించిన సమస్య ఉంటే వారి ముందే సమస్యలు పరిష్కరించాం. కానీ గత ప్రభుత్వం కేవలం హద్దు రాళ్లపై బొమ్మలు వేసుకోవడానికి మాత్రమే భూ సర్వే తెచ్చారు. ఈ భూ సర్వేను నిలిపేస్తాం. వైసీపీ ప్రభుత్వ దోపిడీపై ప్రజల్లో చర్చ జరగాలి. వైసీపీ తప్పిదాలను ప్రజల ముందు పెట్టి వారి అనుమతితోనే చర్యలు తీసుకుంటాం.

ఒకటికి మూడు సార్లు చెప్పా...ఈ సారి ఇక షాక్ ట్రీట్మెంటే

అసాంఘిక కార్యక్రమాలు ఎక్కడ జరిగినా ఊరుకునేది లేదు. గంజాయి మత్తు, ఇష్టానుసారంగా నేరాలు, అత్యాచారాలు చేస్తే ఊరుకనేది లేదు. ఒకటికి మూడు సార్లు హెచ్చరించా...ఈ సారి అఘాయిత్యాలు జరిగితే ఏం జరుగుతుందో కఠినంగా వ్యవహరించి చూపిస్తా. ముచ్చుమర్రి, విజయనగరంలో జరిగిన ఘటనలు సభ్య సమాజం తలదించుకునేలా ఉన్నాయి. ముచ్చుమర్రి బాధిత కుటుంబానికి రూ.10 లక్షలు, విజయనగరం చిన్నారి కుటుంబానికి రూ.5 లక్షలు ప్రభుత్వం నుండి పరిహారం అందిస్తాం. మైనర్లు కూడా అత్యాచారాలకు పాల్పడుతున్నారు. చిన్నారులపై అత్యాచారలకు పాల్పడుతున్నారంటే వ్యవస్థ ఏ విధంగా భ్రష్టు పట్టిందో అర్థమవుతోంది. చర్యల్లేక ఉన్మాదులు మాదిగా తయారవయ్యారు. ఈ దష్పరిణామాలకు గత ప్రభుత్వ అలసత్వమే కారణం. ముచ్చుమర్రి, విజయనగరం ఘటనలపై స్పెషల్ కోర్టు ఏర్పాటు చేస్తాం. అసాంఘిక కార్యక్రమాలకు ఈ సారి షాక్ ట్రీట్మెంట్ ఉంటుంది.’’ అని సీఎం చంద్రబాబు నాయుడు హెచ్చరించారు.