ఏపీలో ఎస్ఐ అభ్యర్థులకు బిగ్ అలర్ట్

దిశ, డైనమిక్ బ్యూరో : ఏపీలో ఎస్ఐ ఉద్యోగాల అభ్యర్థులకు పోలీస్ నియామక మండలి కీలక అప్డేట్ ఇచ్చింది. ప్రాథమిక రాత పరీక్షలో అర్హత సాధించిన అభ్యర్థులకు ఆగస్టు 25 నుంచి దేహదారుఢ్య పరీక్షలు నిర్వహించనున్నట్లు వెల్లడించిన సంగతి తెలిసిందే. ఈ పరీక్షలకు సంబంధించిన కాల్‌ లెటర్లను పోలీసు నియామక మండలి అధికారిక వెబ్‌సైట్‌ https://slprb.ap.gov.in/లో అందుబాటులోకి తీసుకువచ్చింది. దేహదారుఢ్య పరీక్షలకు హాజరయ్యే అభ్యర్థులు తమ రిజిస్ట్రేషన్‌ నంబర్‌, మొబైల్‌ నంబర్‌, పుట్టిన తేదీ వివరాలను ఎంటర్ చేసి కాల్‌ లెటర్‌ పొందొచ్చు అని తెలిపింది. ఆగస్టు 24 మధ్యాహ్నం 3గంటల వరకు కాల్‌ లెటర్లు డౌన్‌లోడ్‌ చేసుకోవాలని సూచించింది. ఇకపోతే మెుత్తం 411 ఉద్యోగాలకు 1,51,288 మంది అభ్యర్థులు ఈ ఏడాది ఫిబ్రవరి 19న పరీక్ష రాశారు. అయితే వారిలో 56,111 మంది దేహదారుఢ్య పరీక్షలకు ఎంపికైనట్లు పోలీసు నియామక మండలి వెల్లడించింది.