Chandrababu Naidu : 7న ఢిల్లీకి ఏపీ సీఎం..కేంద్రమంత్రులతో వీటిపై చర్చ
దిశ, వెబ్ డెస్క్: ఏపీ ముఖ్యమంత్రి నారా చంద్రబాబు నాయుడు ఈ నెల 7వ తేదీన ఢిల్లీకి వెళ్లనున్నారు. ప్రధాని నరేంద్రమోదీ, కేంద్ర హోంమంత్రి అమిత్ షా తో సమావేశమై రాష్ట్ర రాజధాని అమరావతి అభివృద్ధిపై, కేంద్రం గ్యారంటీతో అమరావతికి ప్రపంచ బ్యాంకులు మంజూరు చేసిన రూ.15 వేల కోట్ల నిధులపై చర్చించనున్నారు. అలాగే రాష్ట్రానికి కేంద్రం మంజూరు చేసిన ప్రాజెక్టులను త్వరితగతిన పూర్తి చేయాలని విజ్ఞప్తి చేయనున్నారు. కేంద్ర రైల్వేశాఖ మంత్రి అశ్వినీవైష్ణవ్ తో కూడా సమావేశమై విశాఖ రైల్వే జోన్ భూమి పూజ ముహూర్తంపై చర్చించే అవకాశం ఉన్నట్లు తెలుస్తోంది. అలాగే రాష్ట్రంలో పెండింగ్ లో ఉన్న ఇతర రైల్వే ప్రాజెక్టుల గురించి కూడా చంద్రబాబు చర్చిస్తారని సమాచారం. తరచూ ఢిల్లీకి వెళ్లి.. కేంద్రమంత్రులతో సమావేశమై తమ డిమాండ్లను నెరవేర్చుకునేందుకు సీఎం చంద్రబాబు తీవ్రంగా శ్రమిస్తున్న వేళ.. ఈసారి ఢిల్లీ టూర్ ప్రాధాన్యతను సంతరించుకుంది.
